भांगरभूंय | प्रतिनिधी
पुणे, खबरां संस्था: पुण्याक एक धक्को दिवपी घडणूक घडली. घरांतल्या वादांतल्यान आवयन आपल्या दोगां भुरग्यांचो जीव घेतिल्ल्याची घडणूक मुखार आयली. घोव- बायले मदीं जाल्ल्या वादाचे तिडकीन आवयन दोगां सानुल्यांचो गळो दाबून खून केलो. तशेंच न्हिदिल्ल्या घोवाचे मानेर कोयत्यान वार करून स्वताक पेटोवन घेवपाचो यत्न केलो. ही घडणूक स्वामी चिंचोली (ता. दौंड) हांगा शेनवारा सकाळीं घडली. सध्या ते बायलेच्या घोवाक बारामती हाॅस्पिटलांत दाखल केला. हे घडणुकेक लागून ह्या वाठारांत बरोच बोवाळ जाला.
शंभू ऊर्फ हर्ष दुर्योधन मिंढे (३), पियू दुर्योधन मिंढे (१) अशीं मरण आयिल्ल्या सानुल्यांचीं नांवां. जाल्यार तिचो घोव दुर्योधन आबा मिंढे (३५) हो गंभीर जखमी जाला. ह्या प्रकरणांत दौंड पुलिसांनी बायल कोमल दुर्योधन मिंढे (३०) हिका अटक केल्या.
पुलिसांनी दिल्ले म्हायती प्रमाण, दुर्योधन हो आयटी कंपनींत स्वॉफ्टवेअर इंजिनिअर म्हणून काम करता. मात फाटल्या दोन वर्सां सावन तो वर्कफ्रॉम होम करतालो. कोमल हीय बीएस्सी केमिस्ट्री जाल्या. त्या दोगांय मदीं सदांच वाद जाताले. शुक्रारा रातींय वाद जालो. उपरांत बेडरूमांत कोमल आनी तिची धूव न्हिदिल्लीं. पयलीं तिणें आपले धुवेचो गळो दाबून जीव घेतलो. उपरांत दुसरे एके कुडींत आजये लागसार न्हिदिल्ल्या पूत शंभूक उखलून बॅडरुमांत हाडलो आनी ताचोय गळो दाबलो. मागीर भायर न्हिदिल्ल्या घोवाचो खून करपाच्यो हेतान ताचेर कोयत्यान वार केलो. ह्या वेळार घोवान बोवाळ केल्ल्यान कोमल धांवत बॅडरुमांत आयली. तिणें दार बंद करून, चाकवान आपल्या हाताच्यो शिरो कापपाचो यत्न केलो. उपरांत घरच्या लोकांनी नेटान दाराचेर धपको मारून दार उगडलें आनी कोमलाक आत्महत्त्या करपा पसून वाटयली. त्या दोगांय सानुल्यांचो जीव गेलो.
मजगतीं, दोन दिसां पजलीं शंभू ऊर्फ हर्ष मिंढे हाचो वाडदीस मनयल्लो. हाका लागून घरांत उमेदीचें वातावरण आशिल्लें. मात शुक्रारा जाल्ल्या बारीक झगड्याक लागून कोमल इतलें भिरांकूळ पावल उबारतली हें पळोवन त्या वाठारांत दुख्खाचें वातावरण पातळ्ळां. पुलिसांनी कोमलाक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
