भांगरभूंय | प्रतिनिधी
ताचे पोर्शे गाडयेन दोगांक धपको दिल्ल्यान तांकां जाग्यारूच मरण
पुणे, खबरां संस्था : पुण्यांतल्या कल्याणीनगर वाठारांत एका गिरेस्ताच्या नेण्ट्या पुतान आयतारा सकाळीं पोर्शे गाडयेन दोगांक धपको दिल्ल्यान त्या दोगांकूय जाग्यारूच मरण आयिल्लें. तो नेण्टो चलो पुण्यांतले बांदकाम वेवसायीक आनी ब्रह्मा कॉर्पाचे संचालक विशाल अग्रवाल हांचो पूत. तांणी दुचाकी वयल्यान वचपी अनिश अवधिया आनी अश्विनी कोस्ता हांकां गाडयेन चिड्डलीं. ह्या वेळार पोर्शे गाडी बरीच वेगान आशिल्ली. गाडयेन दुचाकीर दिल्ल्या धपक्यान अश्विनी कोस्ता उडून पयस पडिल्ल्यान तकली आपटून तिका जाग्यारूच मरण आयलें. जाल्यार अनिस अवधिया हाचे छातये कडेन मार बशिल्ल्यान ताकाय मरण आयलें.
हे घडणुके उपरांत लोकांनी बरोच राग उक्तायलो. मात पुलिसांनी विशाल अग्रवाल हांच्या पुताक विशेश वागणूक दिल्ल्याचे प्रकार मुखार आयल्या. हाका लागून लोक बरेच तिडकल्यात. ससून हॉस्पिटलांत वैजकी तपासणी केल्या उपरांत कारचालक पूत आनी ताच्या इश्टांक दनपरां देडाक सुमार येरवाडा पुलीस स्टेशनार हाडले. तेन्ना तांच्या कुटुंबीयांनी वरिश्ठ पुलीस अधिकार्यांच्या परवानगेन भुरग्यांक खातीर भायल्यान पिझ्झा आनी बर्गर मागयलो. एका पुलिसान हें खाण फाटले वटेनच्यान पुलीस स्टेशनांत व्हेलें, अशें चित्र एका दिसाळ्यांत छापून आयलां.
गिरेस्ताच्या पुताक १५ वरांनी जामीन
ह्या अपघाता उपरांत थळाव्यांनी विशाल अग्रवाल हांच्या पुताक पोर्शे गाडयेंतल्यान भायर काडून बरोच बडयल्लो. उपरांत ताका पुलिसांचे सुवादीन केलो. मात, हो गिरेस्ताचो पूत १५ वरांनी जामिनाचेर भायर आयलो. न्यायालयान ताका १५ दीस येरादारी पुलिसां वांगडा चौकांत उबो रावन काम करपाची, येरादारीचे बोर्ड रंगोवपाची आनी अपघात ह्या विशयाचेर ३०० शब्दांचो निबंद बरोवपाचे खर निर्देश दिले. तशेंच ताचें मानसोपचार तज्ज्ञांकडल्यान समुपदेशन करपाकूय सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
