भांगरभूंय | प्रतिनिधी
पेडणें: पुजा नायक हांणी पुरावे पुलिसांक दिवचे. म्हजे कडेन दिवपाची गरज ना. ओगीच कोणायचींय नांवां घेवपाक मेळनात. भौशीक तरेन नांवां घेवचे परस पुलिसांक हाडून पुरावे दिवचे. ना जाल्यार न्यायदंडाधिकार्यां मुखार म्हायती दिवची. तपासांत कितेंय सत सांपडल्यार, मंत्री आसूं वा अधिकारी, सगल्यांचेर खरांतली खर कारवाय जातली, अशें मुख्यमंत्री डॉ. प्रमोद सावंत हांणी पेडण्यां पत्रकारांच्या प्रस्नाक जाप दितना सांगलें.
डाॅ. सावंत हे पेडण्यां सहकार संमेलनाक हाजीर राविल्ले कडेन पत्रकारांनी तांकां प्रस्न विचारले. सरकारी नोकरे खातीर पयशे घेवप हो व्हड घोटाळो जावन आसा. पुजा नायक हांणी केल्ल्या आरोपा विशीं कितें कारवाय जातली? असो प्रस्न केलो तेन्ना मुख्यमंत्र्यान ह्या प्रस्नाची जाप दिली.
मुख्यमंत्र्यानी मुखार सांगलें, पुजा नायक हांणी केल्ले आरोप सत आसल्यार आपूण पुलिसांक परत एक फावट आपोवन तांची एफआयआर नोंद करून घेतां. तशेंच हे विशीं पुरायेन चवकशी करपाचे आदेशूय तांणी दिले.
पुजा नायकाक जाचीं कोणाचीं नावां घेवपाचीं आसात वा, खंयच्याय मंत्र्याचेंय नांव आसल्यार तें तिणें पुलीस अधिकार्यां कडेन दिवचें. जर हातूंत कितेंय सत सांपडलें जाल्यार आमचें सरकार संबंदीतांचेर खर कारवाय करतलें. तिणें जाहीरपणान जनतेक सांगचे बदला पुलिसांक सांगून चवकशी करपाक लावची. हातूंततच खरी पारदर्शकताय आसपाक शकता, अशें डॉ. सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
