भांगरभूंय | प्रतिनिधी
पणजी: नोकरे खातीर पयशे दिवपाच्या घोटाळ्यांतलें मुखेल दुबावीत पुजा नायक हाणें आयएएस अधिकारी आनी अभियंत्याक पयशे दिल्ल्याचो दावो केल्लो. ह्या दाव्याचे पडटाळणे खातीर गुन्यांव फांट्याचे निरिक्षक दत्तरगुरू सावंत हांणी पुजा नायक हिची नार्को चांचणी करपा खातीर पणजेंतल्या पयलो वर्ग न्यायालयांत अर्ज दाखल केला.
हालींच पुजा नायकान आरोप केल्लो की, 2029 च्या मेगा भरती वेळार 613 उमेदवारां कडल्यान सरकारी नोकरे खातीर घेतिल्ले 17.68 कोटी एक आयएएस अधिकारी आनी भौशीक बांदकाम विभागाच्या एका वरिश्ठ अभियंत्याक दिल्ले. हें काम एका वरिश्ठ मंत्र्याच्या सांगण्याचेर केल्ल्याचे पुरावे पुलिसां कडेन आशिल्ल्याचो गंभीर दावोय तिणें केल्लो.
ह्या आरोपांक लागून गोंयांत खवदळ पडिल्लो. उपरांत कांय दिसांनी आयएएस अधिकारी निखील देसाय आनी भौशीक बांदकाम खात्याचे प्रधान मुखेल अभियंतो उत्तम पार्सेकार हांच्या नांवांचो खुलासो केल्लो.
ह्याच वेळार पुजान नायक हाचे आड म्हाड्डोळ पुलीस स्टेशनार नोंद आशिल्लो गुन्यांव रायबंदरच्या गुन्यांव फांट्यांत वर्ग केलो. उपरांत गुन्यांव फांट्यान पुजा नायकाची चवकशी केल्ली. ह्याच वेळार पुजा नायकान आपूण चवकशे मजगतीं ‘नार्को टेस्ट’ दिवपाक तयार आशिल्ल्याचें निवेदन सोशल मिडियाचेर केल्लें.
मजगतीं, गुन्यांव फांट्याचे निरिक्षक दत्तरगुरू सावंत हांणी पणजेंतल्या पयलो वर्ग न्यायालयांत अर्ज केला.
नोकरे खातीर पयशे घेतिल्ल्याचो फटीचो आरोप करून बदनामी केल्ल्या प्रकरणांत आयएएस अधिकारी निखील देसाय हांणी पुजा नायकाक कायदेशीर नोटीस दिल्ली. ते प्रमाण नायक हिणें कसलोच प्रतिसाद दिवंक नाशिल्ल्यान देसाय हांणी तिचे आड पणजेंतल्या पयलो वर्ग न्यायालयांत अब्रुलुकसाणेचो अर्ज दाखल केला. ह्या प्रकरणाची फुडली सुनावणी 13 जानेवारीक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
