भांगरभूंय | प्रतिनिधी
लोकांची वाडल्या उमळशीक : आनीक कितल्या जाणांक लायल्या शेंडी !
भांगरभूंय । प्रतिनिधी
फोंडें: म्हाड्डोळ पुलिसांनी सरकारी नोकरी प्रकरणांत पुजा नायक हिका अटक केली जाल्यार फोंडें पुलिसांनी दीपश्री सावंत हिका अटक केल्या. पुजा नायक आनी दीपश्री सावंत हांचें कनेक्शन आशिल्ल्याचो दुबाव उक्तायतात. पूण गोंयांत सरकारी नोकरी दिवपा खातीर फटवणूक केल्ल्या दीपश्री सावंत आनी पुजा नायक सध्या पुलीस कोठडेंत आसात. दोगूय दुबावितांनी राजकी फुडाऱ्यां वांगडा आशिल्ले फोटो दाखोवन लोकांक शेंडी लायिल्ल्याचें उजवाडाक आयलां. ताका लागून ह्या दोगांचो ‘गॉडफादर’ कोण, हाची उमळशीक लोकांक लागल्या.
उसगांवचे एके बायलेक माशेलांतल्या एका हायस्कुलांत शिक्षकाची नोकरी दिवपा खातीर पुलीस कर्मचारी आशिल्ल्या सागर नायक हाणें 15 लाख रुपया घेतिल्ले. ती रकम सागर नायक हाणें आपली मामी तशेंच मुख्याध्यापिका आशिल्ल्या सुनिता पावसकार हाचे वरवीं दीपश्री सावंत हिका दिल्ले. रितसर कागाळ दाखल जाले उपरांत पुलिसांनी गुन्यांव नोंद करून सगळ्यांत पयलीं सागर नायक आनी ताची मामी सुनिता पावसकार हांकां अटक केली. पूण आपल्या सांगात्यांक अटक केल्ल्याची म्हायती मेळटाच दीपश्री सावंत ही मुख्य सुत्रधार आशिल्ली बायल लिपून राविल्ली. ताका लागून फोंडें पुलिसांनी दीपश्री सावंत हिचे आड लूक आवट नोटीस जारी केल्ली.
अखेर बेळगांव सावन परतून येतना फोंडें पुलिसांनी दीपश्री सावंत हिका मोले तपासणी नाक्या वयल्यान प्रवेश करताच अटक केल्ली. अटक केल्ल्या दीपश्री सावंत हिच्यो 3 आलिशान मोटारी आनी 2 स्कुटरी पुलिसांनी जप्त केल्यात. तशेंच सांवड्डें वाठारांतल्या एका मनशान सरकारी नोकरे खातीर सागर नायक हाणें 10 लाख रुपया घेतिल्ल्याचो गुन्यांव फोंडें पुलीस स्टेशनार नोंद केला. त्या प्रकरणांत सागर नायक हाका अटक केल्ली. ती रकम सागर नायक हाणें दीपश्री सावंत हिका दिल्ल्यान फोंडें पुलीस परतून दीपश्री सावंत हिका अटक करतले. अटक केल्ल्या दीपश्री सावंत हिका सध्या न्यायालयान 5 दिसांचो रिमांड दिला. रिमांड सोंपताच दीपश्री सावंत हिका परतून अटक करतले.
म्हाड्डोळ पुलीस स्टेशनार दोन तरणाट्यांक सरकारी नोकरी दिवपाच्या नांवान सुमार 14 लाख रुपया घेवन फटवणूक केल्ल्या प्रकरणांत पुलिसांनी पुजा नायक आनी अजीत सतरकार हांकां अटक केल्ली. ते उपरांत पुजा नायक हिचे आड दिवचल आनी पर्वरी पुलीस स्टेशनार गुन्यांव नोंद केल्यात. सध्या पर्वरी पुलिसांनी पुजा नायक हिका अटक केल्या, पूण केरीच्या श्रीधर सतरकार हांणी आत्महत्या केल्ल्यान पुजा नायक हाचे आड म्हाड्डोळ पुलीस स्टेशनार गुन्यांव नोंद केला. ताका लागून पुजा नायक हिका बेगिनूच म्हाड्डोळ पुलीस अटक करतले. तशेंच बिरेस्तारा दीपश्री सावंत हिचे आड 44 जाणांची फटवणूक केल्ल्याची कागाळ दाखल केल्या. ते खातीर पुलीस केन्ना गुन्यांव नोंद करतले, हाचेर सगळ्यांची नदर आसा.
दीपश्री आड अजून म्हाड्डोळा गुन्यांव नोंद ना
म्हाड्डोळ पुलीस स्टेशनार बिरेस्तारा दीपश्री सावंत हिणें सुमार 4 कोटी रुपयाड अजून ग घेवन फटवणूक केल्ल्याची कागाळ दाखल जाल्या, पूण शुक्रारा सांज मेरेन पुलिसांनी गुन्यांव नोंद करूंक नाशिल्लो. दीपश्री सावंत हिणें माशेल वाठारांतल्या 44 जाणां कडल्यान सरकारी नोकरी दिवपाच्या निमतान रकम घेतिल्ली, अशें कागाळेंत नमूद केलां. माशेल वाठारांत आनीक कितल्याश्याच जाणां कडल्यान तिणें पयशे घेतल्यात, असो दुबाव उक्तायतात. माशेल वाठारांत आनीक लेगीत तरणाट्या चल्या- चलयांनी सरकारी नोकरे खातीर व्हड रकम दिल्या, अशी चर्चा आसा. ताका लागून फुडल्या कांय दिसांनी आनीक कागाळी पुलीस स्टेशनार येवपाची शक्यताय आसा. तशेंच हेर वाठारांनी लेगीत सरकारी नोकरे खातीर रोख रकम दिल्ल्याचो प्रकार चर्चेंत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
