भांगरभूंय | प्रतिनिधी
भारताच्या टॅस्ट पंगडाचो मदले फळयेंतलो बॅट्समन चेतेश्वर पुजारा वॅस्ट इंडिजाचे भोंवडे उपरांत परतून कावण्टी क्रिकेटींत खेळपाक इंग्लंडाक वतलो. पुजारा कावण्टींत ससॅक्सा वतीन खेळटा. संवसारीक टॅस्ट वस्तादपण सर्तीचे फायनली पयलीं ह्या हंगामांत ससॅक्सा वतीन 6 मॅचींनी खेळटना आठ डावांत ताणें तीन शेंकडे आनी एक अर्द शेंकडो मारला.
एप्रीलांत डरहमा आड शेंकडो मारून ताणें कांवण्टी हंगामाची सुरवात केल्ली. ते उपरांत ग्लॉस्टरशायर आनी वुस्टरशायर ह्या पंगडां आड शेंकडे मारिल्ले. स मॅचींनी ताणें ससॅक्साचें फुडारपण लेगीत केल्लें. ताणें 68.12चे सरासरीन 545 धांवड्यो केल्यात. पोरूंचे भशेन अंदूं लेगीत रॉयल लंड करंड सर्तींत वांटो घेतलो.
सध्या कावण्टी सर्किटांत एकमेव भारतीय दावखुरो फास्ट बॉलर अर्शदीप सिंग आसा. तो आपल्या पयल्या कावण्टी हंगामांत केंट वतीन खेळटा. ताणें आतां मेरेन एके मॅचींत 90 धांवड्यांनी 2 विकेटी घेतल्यात. ह्या हंगामा खातीर लिसेस्टरशायरान भारताचो आनीक एक बॅट्समन अजिंक्य रहाणे कडेन कबलात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
