भांगरभूंय | प्रतिनिधी
वॅस्ट इंडिजा आड फुडल्या म्हयन्यांत जावपी दोन टॅस्ट मॅचींचे आनी वन डे मॅचींचे माळे खातीर भारताच्या पंगडाची घोशणा केली. अणभवी बॅट्समन चेतेश्वर पुजारा आनी फास्ट बॉलर उमेश यादव हांकां टॅस्ट पंगडांतल्यान भायर काडल्यात, जाल्यार फास्ट बॉलर मोहम्मद शमीक विसव दिला.
युवा बॅट्समन यशस्वी जयस्वाल आनी ऋतुराज गायकवाड हांकां पंगडांत सुवात दिल्या. फास्ट बॉलर नवनीत सैनीचें पुनरागमन जालां. अजिंक्य रहाणेक टॅस्ट पंगडाचो उप मुखेली केला.
संवसारीक टॅस्ट वस्तादपण सर्तीचे फायनली वरवीं रहाणेचें पुनरागमन जाल्लें. ताणें फायनलींत 89 आनी 46 धांवड्यांची खेळी केल्ली.
मजगतीं वन डे माळे खातीर विकेटकीपर बॅट्समन संजू सॅमसनाचें पुनरागमन जालां. ताका जखमी लोकेश राहुलाचे सुवातेर घेतला. सॅमसनान आपली निमाणी वन डे मॅच न्युझिलॅण्डा आड नोव्हेंबर 2022त खेळिल्लो.
वॅस्ट इंडिजाचे भोंवडेर भारत टी-20 माळ लेगीत खेळटलो. पूण, निवड समितीन टी-20 पंगडाची घोशणा करूंक ना.
पयली टॅस्ट 12 ते 16 जुलय मेरेन विंडसर पार्कांत चलतली. दुसरी टॅस्ट 20 ते 24 जुलय मेरेन क्विन्स पार्क ओव्हलांत चलतली.
वन डे माळेंतली पयली मॅच 27 जुलयाक केंसिंग्टन ओव्हलांत, दुसरी मॅच 29 जुलयाक केंसिंग्टन ओव्हलांत आनी तिसरी मॅच 1 ऑगस्टाक ब्रायन लारा क्रिकेट अकादमी स्टेडियमाचेर जातली.
पयली टी-20 मॅच 3 ऑगस्टांत ब्रायन लारा क्रिकेट अकादमी स्टेडियमाचेर, दुसरी 6 ऑगस्टाक गुयाना नॅशनल स्टेडियमाचेर, तिसरी मॅच 8 ऑगस्टाक गुयाना नॅशनल स्टेडियमाचेर, चवथी मॅच 12 ऑगस्टाक लॉडरहिलांत आनी 13 ऑगस्टांत लॉडरहिलांत जातली.
———
टॅस्ट पंगडः रोहित शर्मा (मुखेली), शुभमन गिल, विराट कोहली, अजिंक्य रहाणे (उप मुखेली), ऋतुराज गायकवाड, यशस्वी जयस्वाल, केएस भरत (विकेट कीपर), रविचंद्रन अश्विन, रवींद्र जडेजा, अक्षर पटेल, शार्दूल ठाकुर, मोहम्मद सिराज, मुकेश कुमार, जयदेव उनाडकट, ईशान किशन (विकेट कीपर) आनी नवदीप सैनी.
वन डे पंगड: रोहित शर्मा (मुखेली), शुभमन गिल, ऋतुराज गायकवाड, विराट कोहली, सुर्यकुमार यादव, संजू सॅमसन (विकेट कीपर), ईशान किशन (विकेट कीपर), हार्दिक पांड्या (उप मुखेली), शार्दुल ठाकुर, रवींद्र जडेजा, अक्षर पटेल, युजवेंद्र चहल, कुलदीप यादव, जयदेव उनाडकट, मोहम्मद सिराज, उमरान मलिक, मुकेश कुमार.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
