भांगरभूंय | प्रतिनिधी
राहुल गुप्ता : खूबशे दावे चुकीचें आशिल्ल्याचें चवकशेंत दिसलां
भांगरभूंय । प्रतिनिधी
पणजी : सरकारी नोकर भरती घोटाळ्यांतली मुखेल दुबावीत पुजा नायकान सरकारी अधिकार्यांचेर केल्ले आरोप तपासले तेन्ना तातूंत कांयच सत नाशिल्ल्याचें आनी भोवतेक आरोप चुकीचे आशिल्ल्याचें सिद्ध जालां, असो दावो उत्तर गोंय पुलीस (गुन्यांव फांटो) अधिक्षक राहुल गुप्ता हांणी केलो. रायबंदरच्या गुन्यांव फांट्याच्या कार्यालयांत ते पत्रकारांक कडेन उलयताले.
पुजाचो एक व्हिडियो 9 नोव्हेंबराक सोशल मिडियाचेर व्हायरल जाल्लो. तातूंत ताणें 2019 ते 2022 ह्या काळांत सरकारी नोकर्यो मेळोवन दिवपा खातीर दोन सरकारी अधिकार्यांक 17 कोटी 68 लाख रुपया दिल्ल्याचो गंभीर आरोप केल्लो. उपरांत गुन्यांव फांट्यान दोन सरकारी अधिकार्यांचेर केल्ल्या आरोपा विशीं भारतीय न्याय संहिता कलम 173 (3) खाला चवकशी सुरू केल्या.
राहुल गुप्ता हांणी सांगलें, पुजाचे आरोप सामके गंभीर आशिल्ल्यान गुन्यांव फांट्यान तिचे दोन फावटीं सविस्तर जबाब नोंद केल्यात. हालींच तिची पांच वरां परस चड वेळ चवकशी केली. हे चवकशे मजगतीं पुलिसांनी पुजा नायकान केल्ल्या दरेका दाव्यांचें सत तपासपाक सुरवात केली. हातूंत खूबशे दावे चुकीचे आशिल्ल्याचें दिसलें. तातूंत मात्तूय सत ना.
फ्लॅटाचो दावो फटीचो
पीडीए कॉलनींतल्या एका फ्लॅटांत ह्या पयशांचे वेव्हार जातात असो दावो पुजान केल्लो. मात, पुलिसांनी त्या फ्लॅटाच्या धनया कडेन चवकशी केली तेन्ना, तांणी 2019 सावन त्या फ्लॅटात फक्त हॉटेल मॅनेजमेंटाचे विद्यार्थी रावताले, अशें पुरावे दिवन सांगलें.
अधिक्षक राहुल गुप्ता हांणी म्हणलें, पुजा नायकान केल्ले कांय आरोप हे प्रथमदर्शनी उपलब्ध आशिल्ल्या हेर पुराव्यां कडेन जुळनात. हाका लागून तिचे आरोप ‘फकत तोंडी’ स्वीfकारपाक शकनात आनी हे दावे खरपणान तपासपाची गरज आसा.
गुन्यांव फांट्याचो तपास चालूच
अधीfक्षक राहुल गुप्ता हांणी पत्रकारांक सांगलें, आरोप गंभीर आशिल्ल्यान तपास चालूच उरतलो. गुन्यांव फांटो सध्या नोंद केल्ल्या जबाबांचें विश्लेशण केल्ल्यान ह्या प्रकरणांत फुडाराक कारवाय कितें करची, हाचो निर्णय घेतले. ह्या घोटाळ्यांतल्या शेकड्यांनी पिडेस्तां कडल्यान नोकरीचें आस्वासन दिवन व्हड रक्कम लांच म्हूण घेतिल्ल्यांच्या आरोपांचीय चवकशी सुरू आसा.
मजगतीं, जांकां पयशे घेवन नोकरी दिल्या, तांचीय तपासणी जावपाक जाय. कोणा कडल्यान पयशे घेवन नोकरी दिल्या वा नोकरेचें आस्वासन दिलां, तें आपणाक खबर आसा, अशें पुजा व्हिडियोचेर सांगतना दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
