भांगरभूंय | प्रतिनिधी
पुणे, खबरां संस्था : प्रशिक्षणार्थी आयएएस अधिकारी पूजा खेडकर हाचे विशीं आनीक एक खबर उक्ताडार आयल्या. एके म्हायती प्रमाण पुजान परिक्षे मजगतीं भरिल्ल्या अर्जार आपले पालक वेगळे जाल्ल्याची (घटस्फोट) चुकीची म्हायती दिवन हेर मागासवर्गीय नॉन-क्रिमी लेअर कोट्याचो फायदो घेतला. पुणे पुलिसांनी वरीश्ठ अधिकार्यांनी दिल्ले म्हायती प्रमाण केंद्र सरकारान पुणे पुलिसांक पुजा खेडकर हांच्या पालकांचे लग्नाचे स्थितीची म्हायती दिवपाचे निर्देश दिल्यात.
परिक्षेच्या नेमां प्रमाण ज्या उमेदवारांच्या पालकांचें वर्सुकी उत्पन्न ८ लाख रुपयां परस उणें आसा तेच लोक हेर मागासवर्गीय नॉन-क्रिमी लेअरच्या श्रेणीत येतात. पुजान केल्ल्या दाव्या प्रमाण तिचीं आवय- बापूय वेगळीं जाल्यांत आनी ती आवय वांगडा रावताली. जाल्यार तिचे बापूय सरकारी नोकरेंत क्लास वन अधिकारी आशिल्ले. आतां एकंदरीत प्रकरणांत जायते उक्ताडार आयिल्ल्यान केंद्र सरकारान पुणे पुलिसांक हाचेय विशीं पुजा खेडकरच्या आवय-बापायचे लग्नाचे जिणेचे आनी स्थितीचे अहवाद सादर करपाचे निर्देश दिल्यात.
पूजान बनावट अपंगत्व प्रमाणपत्र मेळोवन दिवपाक मजत करपी दोतोर आनी सहाय्यकांच्या आड चवकशेचे आदेश दिल्यात. दोतोरां सयत पूजाक मजत करपी सगळ्यांची चवकशी करपाचे आदेश अपंग कल्याण विभागाच्या आयुक्तांनी दिल्यात. पुजा खेडकर हांकां प्रमाणपत्र दिवपी वैजकी विभागाचेर कारवाय करपा खातीर पिंपरी महापालिकेचे समितीक चवकशेचे आदेश दिल्यात.
वायसीएम हॉस्पिटला वरवीं पूजा खेडकर हिका अपंगत्व प्रमाणपत्र जारी केल्लें. हातूंत तिच्या दाव्या धोपरांत ७ टक्के कायमचें अपंगत्व आशिल्ल्याचें नमूद केल्लें. तपासांत दोशी सांपडल्यार दोतोर आनी अपंगत्व प्रमाणपत्र दिवपी सगळ्या व्यक्तींचेर गुन्यांव दाखल करतले. तपासाचो पुराय अहवाल जिल्लोधिकारी कार्यालयाक सादर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
