भांगरभूंय | प्रतिनिधी
दोन खेपेची ऑलिम्पीक पदक जैतिवंत पी व्ही सिंधू हिणें स्कॉटलॅण्डाची कर्स्टी गिलमूर हिका 21-17 आनी 21-16 अशा सरळ गेमींनी हारोवन मलेशिया मास्टर्स बॅडमिंटन सर्तीचे दुसरे फेरयेंत सुवात मेळयली. सिंधून 2013 आनी 2016त ही सर्त जिखिल्ली.
दुखापती कडेन झुजपी सिंधू खातीर अंदूंचें वर्स बरें वचूंक ना. ती अंदूं पयल्या किताबाच्या सोदांत आसा. फेब्रुवारींत बॅडमिंटन आशिया टीम चॅम्पियनशिपींत जखमी जाल्या उपरांत पयले खेपे खेळटा. पॅरीस ऑलिम्पिकाची तयारी करपा खातीर तिणें हालींच जाल्ले उबेर कप आनी थायलॅण्ड ओपनांत वांटो घेवंक नाशिल्लो.
मजगतीं, त्रिसा जॉली आनी गायत्री गोपीचंद हे भारताचे जोडयेन बायलांच्या दोट्टी गटाचे दुसरे फेरयेंत सुवात मेळयली. तांणी हुआंग यू हून आनी लियांग तिंग यू हे तायपेचे जोडयेक सहज हारयली.
राष्ट्रकूल खेळां सर्तींत कांश्या पदक जिखपी त्रिसा आनी गायत्री हांकां सर्तींत सातवें सिडींग दिलां. तांणी संवसारीक क्रमवारींत 104वे सुवातेर आशिल्ले जोडयेक 21-14 आनी 21-10 अशा सरळ गेमींनी हारयली.
दादल्यांच्या गटांत एकोड्या गटांतल्यो पात्रताय मॅची जाल्यो. पूण, तातूंत वांटेकार जाल्ल्या भारताच्या एकल्याकूय मुखेल सर्ती खातीर पात्र जावपाक जमलें ना. डिसेंबरांत जाल्ले ओडिशा मास्टर्स सर्तींत वस्तादपण जोडपी सतीश कुमार करुणाकरनान पात्रताय फेरयेंतले पयले मॅचींत मलेशियाच्या चिम जून हाका 21-15 आनी 21-19 असो सरळ गेमींनी हारयलो. पूण, फुडले फेरयेंत ताका इंडोनेशियाच्या हेरीन रिसोतावितो कडल्यान 21-13, 20-22 आनी 12-31 अशा फरकान हार घेवची पडली.
संवसारीक ज्युनियर सर्तींत कांश्या पदक जिखपी आयुष शेट्टीन लेगीत पयले लडतींत कार्तिकेय गुलशन कुमाराक 21-7 आनी 21-14 असो हारयलो. पूण, फुडले फेरयेंत ताका थायलॅण्डाच्या पणिचाफोन तेरारत्सकुल कडल्यान 21-23, 21-16 आनी 17-21 अशा तीन गेमींनी हार घेवची पडली. जाल्यार एस शंकर सुब्रमण्यमाक रुस्तावितो कडल्यान 12-21 आनी 17-21 अशी हार घेवची पडली. बायलांच्या एकोड्या गटांतले पात्रताय सर्तींत तान्या हेमंथाक तायपेचे लीन सिह यून कडल्यान 21-23, 8-21 अशी हार घेवची पडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
