पी व्ही सिंधू क्वॉर्टरफायनलींत

भांगरभूंय | प्रतिनिधी

दोन खेपेची ऑलिम्पीक पदक जैतिवंत पी व्ही सिंधून मलेशिया मास्टर्स बॅडमिंटन सर्तीचे क्वॉर्टरफायनलींत सुवात मेळयली. तिणें कोरियाचे यू जीन सिम हिका 59 मिनटां मेरेन चलिल्ले प्री क्वॉर्टरफायनलींत  21-13, 12-21 आनी 21-14 अशा तीन गेमींनी हारयली.

संवसारीक क्रमवारींत 15वे सुवातेर आशिल्ले सिंधूक यू जीन हिणें पयले गेमींत खर आव्हान दिलें. दोगांयनी एकेक गुणा खातीर संघर्श केलो. दोगांय 10-10 अशें गूण घेवन बरोबरीचेर आशिल्ली. ते उपरांत मात सिंधून आपलो सगलो अणभव पणाक लायलो आनी सेगीत सेगीत गूण घेत प्रतिस्पर्धी खेळगडयेचेर चेपण दवरलें आनी पयली गेम 21-13 फरकान जिखली.

दुसरे गेमींत लेगीत दोगांयनी एकामेकाक खर आव्हान दिलें. एका वेळार स्कोर 8-8 असो आशिल्लो. हांगाच्यान कोरियाचे खेळगडेयन जबरदस्त खेळ केलो. तिणें कांय आकर्शक शॉर्ट मारून मॅचीचेर पकड दवरपाक सुरवात केली. स्कोर 18-12 असो आपले वटेन वळयल्या उपरांत जीन सीमान 21-12 अशें जैत जोडून मॅचींत 1-1 अशी बरोबरी सादली.

तिसरे आनी निर्णायक गेमींत सिंधूची सुरवात बरी जाली ना. कोरियाचे खेळगडयेन 4-1 अशी आघाडी घेतली. पूण, सिंधून हार मानूंक ना. तिणें सेगीत पांच गूण घेतले, एका वेळार स्कोर 8-8 असो बरोबरीचेर आशिल्लो. ते उपरांत सिंधून उत्कृश्ट खेळ करून 21-14 फरकान गेम आनी मॅच जिखून फुडले फेरयेंत सुवात मेळयली.