पी. व्ही. नरसिंह राव, चौधरी चरण सिंह आनी एम.एस स्वामीनाथन हांकां भारतरत्न
भांगरभूंय | प्रतिनिधी
नवी दिल्ली, खबरां संस्था ः काँग्रेस फुडारी, आदले प्रधानमंत्री पी. व्ही. नरसिंह राव हांकां मरणोत्तर भारतरत्न पुरस्काराची घोशणां केली. तेच बरोबर आदले प्रधानमंत्री चौधरी चरण सिंह आनी शेतकी मळार क्रांती घडोवपी डॉ. एम एस स्वामीनाथन हांकांय भारतरत्न पुरस्कार जाहीर जाले. प्रधानमंत्री मोदी हांणी एक्स खात्याचेर पोस्ट घालून ह्या तिनूय फुडाऱ्यांचीं नांवां जाहीर केलीं.
अर्थीक उदरगतीचें मळार वावुरपी पी. व्ही. नरसिंह राव
“एक नामनेचे विद्वान राजकारणी नरसिंह राव हांचो भारताचे उदरगतींत म्हत्वाचो वांटो आसा. तांणी आंध्र प्रदेशाचे (एकवटीत) मुख्यमंत्री, केंद्रीय मंत्री आनी जायतीं वर्सां संसद आनी विधानसभेचे वांगडी म्हणून तें वावुरलें. तांच्या दूरदृश्टी फुडारपणाक लागून अर्थीक मळार भारत मुखार आयलो. देशाक समृद्धी आनी उदरगतीच्या मळार व्हरपाक तांणी मोलादीक भुमिका साकारली”, अशें प्रधानमंत्री मोदी हांणी सांगलें. तांणी संवसारीक बाजारपेठेंत भारताचें दार उक्तें केलें. ताका लागून अर्थीक उदरगतीच्या नव्या युगाची सुरवात जाली. हाचे भायर परराश्ट्र धोरण, भास आनी शिक्षण ह्या मळार ताणी दिल्ल्या योगदानान भारताक मुखार व्हेले अशेंय प्रधानमंत्री मोदी हांणी म्हणलें.
आणीबाणीच्या विरोधात चौधरी चरण सिंह लढलें
चौधरी चरण सिंह हांणी दिल्ल्या अतुलनीय योगदाना खातीर आमी हो पुरस्कार चौधरी चरण सिंह हांकां समर्पित करता. शेतकारांच्या हक्का खातीर आनी शेतकारांच्या कल्याणा खातीर ताणें आपलें पुराय जिवीत ओंपलें. उत्तर प्रदेशाचे मुख्यमंत्री आसूं वा देशाचो गृहमंत्री आसूं वा सादो आमदार आसूं तांणी फकत राष्ट्रनिर्माणाक म्हत्व दिलें. तशेंच ताणी आणीबाणीच्या आड खर भुमिका घेतिल्ली. आमच्या शेतकारी भावांखातीर तांची समर्पणाची वृत्ती आनी आणीबाणीच्या वेळार लोकशाय वाचवपा खातीर दाखयल्ली तयारी आमकां सदांच उर्बा दितली अशें प्रधानमंत्री मोदी हांणी म्हणलें.
शेतकी मळार क्रांती घडोवपी स्वामीनाथन
हरित क्रांतीचे जनक आनी वरिश्ठ शास्त्रज्ञ डॉ. एम. एस. स्वामीनाथन हांकांय भारतरत्न पुरस्कार जाहीर केलो. ताचे विशीं आपली भावना उक्तायतना प्रधानमंत्री नरेंद्र मोदी हांणी म्हणलें, शेतकी मळार आनी शेतकारांच्या कल्याणा खातीर वावुरपी डॉ. एम. एस. स्वामीनाथन हांचो भारतरत्न पुरस्कारान भोवमान करतना खोशी जाता. भारतीय शेतकी मळार खूब आव्हानात्मक काळांत आत्मनिर्भर करपाक स्वामीनाथन हांचो म्हत्वाचो वांटो आशिल्लो. तशेंच शेतवडीच्या मळार आधुनिकता हाडपा खातीरय एम. एस. स्वामीनाथन हांचो म्हत्वाचो वांटो आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
