भांगरभूंय | प्रतिनिधी
कोंकणीची सेवा हें तांचें जिवीत आशिल्लें जें तांकां जिणेंत वयर वयर वचपाक पांखां भशेन आदार करी. हाची वळख आयचे पिळगेक जाता.
पी. जी कामत शतमान स्मृती- हें पुस्तक केरळचे कोंकणी म्हालगडे आनी बहुआयामी व्यक्तिमत्व पी. जी कामतमामाचे जल्मशताब्दी निमतान ‘पी. जी कामत फ़ाउंडेशन’ हांणी उजवाडायलां.
कोंकणी कवितेक, भाशा विज्ञानाक लोकवेदाच्या अभ्यासाक आनी निबंदाक कामतमामाचें योगदान भोव मोलादीक आसा. केरळांत कामतमाम हांचे इतलो कोंकणी भाशेचो अभ्यास वा अध्ययन इतले विस्तृत रुपान कोणेच केल्लो दिसना. साबार कोंकणी युवा लेखकांक तांचे मार्गदर्शन मेळ्ळां. जे कोण प्रतिभावंत आसात तांका तांणी प्रोत्साहन दिलां. रामनाथीं जाल्ल्या कोंकणी परिशदेंत तांणी आपली कविता वाचून उपस्थितांचीं मनां जिखल्यांत. केरळ आनी मुळपिठ गोंय हांचे नातें सांबाळूंक तांणी एक भोवंडी आयोजीत करुन केरळच्या आनी गोंयच्या लेखकांचो मेळ घालून दिलो.
ह्या पुस्तकांत विंगड विंगड म्हालगड्यांनी कामत मामाच्या कार्याचेर आनी तांच्या बहुआयामी व्यक्तीमत्वाचेर बरयिल्ले धा लेख आसात. तातूंत कोंकणी बरपावळींतले पी. जी. कामत -के. गोकुळदास प्रभु, पी. जी कामताचें कार्य आनी काव्य- अंतर्मुखी कविता – एड, उदय भेंब्रे, पी. जी. कामत : शतमान स्मृती -शरतचंद्र शणै, पी. जी. कामत: आधुनीक कोंकणी काव्याचो- आर. एस. भास्कर, पी. जी. कामत : केरळांतल्या कोंकणी पुनरुत्थानाचे शिल्पकार- डॉ. भूषण भावे, पी. जी. कामत माम : कोंकणी ध्यासान समर्पीत जीवन- डॉ. जयंती नायक, पी. जी. कामताची कोंकणी कविता : डॉ. एल. सुनिता बाय, पी. गोपालकृष्ण कामत मामु जावुनु मेगेलो परिचय -ए. आर. बालकृष्ण प्रभू तुपुणित्तुरा, पी. जी. कामत माका गुरु -पी. एन. शिवानंद शणै आनी आदर्श जीवनाची एक देख-पय्यनूर रमेश पै हांच्या अभ्यासपुर्ण लेखांचो आसपाव आसा.
ह्या धावूय लेखांनी पी. जी. कामत हांणी केल्ल्या वावराचो ‘लेखा जोखा’ मेळटा. कोंकणी भास आनी गोंय हांचेर उपाट मोग आनी कोंकणी भास समृद्ध करपाक तांणी तन-मन आनी धन वापरुन केल्लो वावर पळयतगीर ह्या विभुती कडेन नतमस्तक जाले शिवाय रावप जायना. कोंकणी कडलें नातें कितलें मायेस्त आसूं येता हाची देख हो मायेस्त दयावान मनीस आमकां दिता. कोंकणीची सेवा हें तांचें जिवीत आशिल्लें जें तांकां जिणेंत वयर वयर वचपाक पांखां भशेन आदार करी. हाची वळख आयचे पिळगेक जाता.
ह्या पुस्तकांत़ त्या भायर प्रार्थना आनी ओळख ह्यो कोंकणी कविता, एक गीत, गोड्डे रामायणाचें मंगलाचरण, ‘प्रदर्शनी आरंभिली’ ही एस. के. आर. कामत हांच्या मूळ मलयाळम कथेचो कामतमामान केल्लो कोंक़णी अणकार, कोंकणी व्याकरणाचेर एक इंग्लिशींतलो लेख हें कामतमामाच्या कांय साहित्य प्रकारांचो आसपाव आसा. तांच्या ह्या बरपांतल्यान तांचो व्यासंग, चिंतनाची खोलाय आनी बरोवपाची म्होंवाळ शैली हांचो अणभव मेळटा. त्या भायर कामतमामाच्या जिणेंतल्या कांय मोलादीक खिणाच्या छायाचित्रांचो आसपाव आसा.
ह्या पुस्तकाचें संकलन आनी संपादन कोंकणी म्हालगडे पय्यनूर रमेश पै हांणी केलां. पुस्तक ‘पी. जी. कामत फाउंडेशन’ उजवाडायलां.
-सखाराम शेणवी बोरकार
9923306751
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
