भांगरभूंय | प्रतिनिधी
भांगरभूंय । प्रतिनिधी
पेडणेः चित्रकार आनी निवृत्त शिक्षक पी ए सूर्यवंशी हांणी आपल्या अमृत महोत्सवी वाडदिसा निमतान ढवळी- फोंडें हांगच्या लोक विश्वास प्रतिष्ठानाक हे विशेंश भुरग्यां खातीर वावुरपी संस्थेक 1 लाख 5 हजार रुपयांची देणगी दिली. आपल्या 75व्या वाडदिसाक लोकांनी हार-तुरे वा भेट वस्तू दिनास्तना रोख रक्कम दिवची अशें सूर्यवंशी हांणी जाहीर आवाहन केल्लें. ते खातीर तांणी आपल्या वाडदिसाचे कार्यावळी वेळार सभाघरांत एक बॉक्स दवोरिल्लें. तातूंत 1 लाख 5 हजार रुपये जमा जाल्ले. फाटल्या मंगळाराक तांणी ही रक्कम लोक विश्वास प्रतिष्ठानाच्या कार्यालयांत वचून अनूप प्रियोळकार हांचे सुवादीन केली.
लोक विश्वास प्रतिष्ठानाचे शाळेक भेट दिल्या उपरांत थंयचें वातावरण पळोवन, शिक्षक जे तरेन विशेश भुरग्यांक शिक्षण दितात तें पळोवन देवाचें थंय वास्तव्य आसा असो भास आपल्याक जालो अशें सूर्यवंशी हांणी सांगलें. हांगा शिकपी विशेश भुरगीं देवाक वा नशिबाक दोश दिनास्तना खोशेन रावतात. साबार भुरग्यांचे तुळेंत ही भुरगी गिन्यान मेळोवपाचे बाबतींत फुडें आसात अशें चित्र पळोवपाक मेळ्ळें अशेंय तांणी सांगले.
लोक विश्वास प्रतिष्ठानाच्या कार्यालयांत वतना सूर्यवंशी हांच्या वांगडा नवचेतना युवक संघाचो अध्यक्ष कृष्णा पालयेकार, महादेव गवंडी आशिल्लो. थंयच्या शिक्षकान तांकां शाळे विशी म्हायती दिली. सुरवेक विशेश भुरग्यांनी येवकार गीत सादर केलें. फाटल्या 40 वर्सां सावन आपूण वेगवेगळ्या माध्यमांतल्यान लोक विश्वास प्रतिष्ठानाक मजत करीत आयलां. वेगवेगळ्या शाळांनी जादूचे प्रयोग करून तातूंतल्यान प्रतिष्ठाना खातीर आपूण निधी एकठांय करतालों अशें सूर्यवंशी हांणी सांगले. अनूप प्रियोळकार, कृष्णा पालयेकार आनी महादेव गंवडी हांणी ह्या वेळार आपले विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
