भांगरभूंय | प्रतिनिधी
कामत हांकां कला संस्कृती आनी कायदो खातींय मेळपाक शकता
तवडकार हांकां आदिवासी कल्याण आनी पर्यावरण खातींय मेळूं येता
आयज जावपाक शकता अधिकृत घोशणा
भांगरभूंय । प्रतिनिधी
पणजी : दिगंबर कामत आनी रमेश तवडकार हांणी हालींच मंत्रीपदाचो सोपूत घेतला. दोगांकूय व्हड खातीं दिवपाचें निश्चीत जालां. दिगंबर कामत हांकां भौशीक बांदकाम खातें (पीडब्ल्यूडी) जाल्यार रमेश तवडकार हांकां खेळां खातें मेळपाचें निश्चीत जालां. ते भायर कामत हांकां कला संस्कृती खातें आनी कायदो खातें मेळपाची शक्यताय आसा, जाल्यार रमेश तवडकार हांकां आदिवासी कल्याण खातें आनी पर्यावरण खातें लेगीत मेळपाक शकता.
विधानसभेच्या सभापतीपदाचो राजिनामो दिले उपरांत काणकोणचे आमदार रमेश तवडकार आनी मडगांवचे आमदार दिगंबर कामत हांकां बिरेस्तारा मंत्रीमंडळांत सुवात दिली. राजभवनाचेर जाल्ले एका सुवाळ्यांत राज्यपाल अशोक गजपती राजू हांणी तांकां मंत्रीपद आनी गोपनियतेचो सोपूत दिलो. ह्या सुवाळ्याक मुख्यमंत्री डॉ. प्रमोद सावंत आनी हेर साबार मानेस्त हाजीर राविल्ले. मात सोपूत विधी सुवाळ्या वेळार तांकां कसलीं खातीं दितले हे विशींची म्हायती दिवंक नाशिल्ली. मात तांकां आतां कसलीं खातीं मेळटलीं, हें निश्चीत जालां. सोपूत विधी सुवाळ्या उपरांत नव्या मंत्र्यांक खंयचीं खातीं मेळटली हे विशीं राजकी मळार चर्चेक सुरवात जाल्ली. दिगंबर कामत हांकां पीडब्ल्यूडी खातें मेळटलें, हें निश्चीत आसा, कला- संस्कृती आनी कायदो खातेंय तांकां दिवपाची शक्यताय आसा. जाल्यार रमेश तवडकार हांकां खेळां खातें निश्चीत आसा, जाल्यार आदिवासी आनी पर्यावरण खातीं तांचे कडेन दिवपाची शक्यताय आसा.
केन्नाय कितेंय घडपाक शकता : मुख्यमंत्री
बिरेस्तारा सकाळीं सभापतीपदाचो राजिनामो दिवपी रमेश तवडकार हांणी रोखडोच मंत्रीमंडळांत प्रवेश केलो, जाल्यार दिगंबर कामत हांणी लेगीत मंत्रीमंडळांत आपली सुवात निश्चीत केली. केन्नाय कितेंय घडपाक शकता, अशें स्पश्ट करून मंत्रीमंडळांत फुडारांत आनिकूय बदल जावपाक शकतात, अशे संकेत दिले. ताका लागून येता त्या दिसांनी कांय फेरबदल जावपाक शकतात, अशी चर्चा लोकां मदीं चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
