भांगरभूंय | प्रतिनिधी
घडणूक जानेवारी 2021 ते सप्टेंबर 2022 तली
पणजी : हात मारपाची संवय पयलीं सावन लोकां मदीं पळोवपाक मेळटा. अर्थीक भानगडींनी घुस्पल्ले हे लोक उपरांत उजळ माथ्यान भोंवतात. तांकां ख्यास्त जाताच अशें ना. हालींच ‘कॅग’ अहवाल आयलो. तातूंत बांदकाम विभागाच्या मडगांव कार्यालयांत ₹ 15.86 लाखांचो गैरवापर जाल्लो, अशें म्हणलां. अर्थीक नेमा प्रमाण ऑडिट जावंक ना ते पळोवन कॅशियरान सरकारी निधी स्वताच्या वैयक्तीक वापरा खातीर वापरिल्ल्याचें दिसून आयलां.
31 मार्च 2022 दिसा सोंपिल्ल्या अर्थीक वर्साच्या कॅगाच्या अहवाला प्रमाण, जानेवारी 2021 ते सप्टेंबर 2022 मेरेन कॅशियरान वट्ट ₹ 28.80 लाखांची रक्कम हाताळ्ळी. हातूंत सुरवातीची शिल्लक रक्कम ₹ 13,712 आशिल्ली. पूण हातूंतले फक्त ₹ 12.94 लाख सरकारी तिजोरेंत जमा जाले. उरिल्ले ₹ 15.86 लाख योग्य तरेन नोंद जावंक ना, खात्यांत लेगीत जमा जावंक ना. ही व्हडली चूक खात्याचे मुखेली, डीडीओ आशिल्ले कार्यकारी अभियंत्याच्या दुर्लक्षाक लागून जाली, अशें कॅग अहवालांत म्हणलां.
रोख वेव्हार वेळार नोंद जायनाशिल्लें, म्हयन्याची नोंदणी आनी रोख पुस्तकांची नेमान तपासणी जावंक नाशिल्ली आनी अंतर्गत अर्थीक नियंत्रण यंत्रणा पुरायपणान अपेशी आशिल्ली. हाका लागून ही फटवणूक बरोच तेंप लक्षांत येवंक ना, अशें कॅगान म्हणलां.
नोव्हेंबर 2022 वर्सा कॅगाचे तपासणे वेळार कॅशियरान बेगोबेग ₹ 4.18 लाख जमा केल्ले. उपरांत कार्यकारी अभियंत्याच्या सुचोवणे प्रमाण डिसेंबर 2022 वर्सा आनीक 11.82 लाख रुपया भरले. पूण 11 हजार 184 रुपयां 14 डिसेंबर 2023 मेरेन जमा जावंक नाशिल्ले. मार्च 2023 वर्सा ऑडिट निरिक्षणांक जाप दितना, कॅशियरान स्वता खातीर सरकारी निधी वापरला आनी ऑक्टोबर 2022 वर्सा ताका पदा वयल्यान काडला, अशें कार्यकारी अभियंत्यान मान्य केलां. पूण कॅगान ही जाप समाधानकारक ना, अशें नमूद केलें. कारण कसलीच शिस्तभंगाची कारवाय जावंक ना आनी फाटल्या अर्थीक वर्सां विशीं पुराय तपास जावंक ना. देखून आदल्या काळांत आनीक व्हड गैरवेव्हार जाल्ल्याची शक्यताय न्हयकारूंक शकना, अशें कॅगाक दिसता.
दोशी अधिकाऱ्यांक बेगोबेग जापसालदार धरून शिस्तभंगाची कारवाय सुरू करची. मार्च, जून आनी ऑक्टोबर 2023 त हें प्रकरण गोंय सरकारा कडेन धाडलें तरी एप्रिल 2024 मेरेन अधिकृत प्रतिसाद मेळूंक नाशिल्लो, अशें कॅगान अहवालांत म्हणलां. सरकारी खात्यांतली अर्थीक जापसालदारकी, पारदर्शकताय आनी नियंत्रणांत गंभीर उणाव उक्ते जाल्यात आनी सरकारी निधीची राखण करपाक संस्थांनी सुदारणा करपाची गरज ‘कॅगा’न उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
