भांगरभूंय | प्रतिनिधी
2805 उमेदवार; आयतारचे ‘सीबीटी’चो निकाल जाहीर
भांगरभूंय । प्रतिनिधी
पणजी : पुलीस उपनिरिक्षकांचे (पीएसआय) भरती प्रक्रियेंत सीबीटी परिक्षे उपरांत जावपी शारिरीक चांचणे खातीर 2805 उमेदवारांची निवड जातली. शारिरीक चांचणे उपरांत दुसरी सीबीटी परीक्षा जातली. पीएसआयची जितलीं पदां भरपाचीं आसात, ताचे पंदरा पटींनी उमेदवारांची निवड शारिरीक चांचणे खातीर जातली, अशी म्हायती कर्मचारी भरती आयोगाच्या अधिकाऱ्यान दिली.
पुलीस खात्यांत पुलीस उपनिरिक्षकांचीं (पीएसआय) 187 पदां खातीर आयतारा पयली सीबीटी परिक्षा जाली. हे परिक्षेचो निकाल जाहीर जाला. गुणांचेर आदारीत शारिरीक चांचणे खातीर उमेदवारांची निवड जातली. 187 पदां मदीं 30 पदां बायलां खातीर राखीव आसात. दादल्यां खातीर 157 पदां आसात. शारिरीक चांचणी खातीर 2355 दादल्यांची जाल्यार 450 बायलांची निवड जातली. दादल्यां खातीर जीं 157 पदां आसात, तातूंत एससी 3, एसटी 19, ओबीसी 41, ईडब्लूएस खातीर 14 पदां राखीव आसात. एससी गटांत शारिरीक चांचणी खातीर 45, एसटी खातीर 285, ओबीसी गटांत 615 जाल्यार ईडब्लूएस गटांत 210 उमेदवारांची शारिरीक चांचणी खातीर निवड जातली.
पीएसआयचीं पदां भरपा खातीर आयोगान 2 मेक जायरात दिल्ली. अर्जांची छाननी केले उपरांत पात्र उमेदवारां खातीर आयतारा पयली सीबीटी परिक्षा जाली. उत्तर गोंयांत आग्नेल इन्स्टिट्यूट ऑफ टॅक्नोलॉजी (आसगांव) आनी सेंट झेवियर म्हाविद्यालय, म्हापशें हांगा परिक्षा जाली. दक्षीण गोंयांत डॉन बॉस्को अभियांत्रिकी म्हाविद्यालय (फातोड्डें), रोजरी म्हाविद्यालय (नावेली) आनी एनआयटी (कुंकळ्ळी) ह्या केंद्रांनी परिक्षा जाली. बायलां खातीर जीं 30 पदां राखीव आसात, तांतूतलीं 3 पदां खेळगड्यां खातीर राखीव आसात. तशेंच एसटी 3, एससी 1, ओबीसी 9 जाल्यार ईडब्ल्यूएस खातीर 3 पदां राखीव आसात. हातूंत लेगीत पदांच्या आंकड्याच्या 15 पट उमेदवारांची निवड शारिरीक चांचणी खातीर जातली. पीएसआय पदा खातीर पिराय 28 मेरेन आसपाक जाय. सरकारी कर्मचाऱ्यां खातीर नेमा प्रमाण 5 वर्सांची सूट मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
