भांगरभूंय | प्रतिनिधी
पणजी: केंद्राच्या प्रधानमंत्री जीवन ज्योती विमो येवजणेक गोंयांत बरो प्रतिसाद मेळत आसा. जून 2024 अखेरेक गोंयच्या 2.99 लाख जाणांनी हे येवजणेचो लाव घेतिल्लो. जून 2025 अखेरेक हे येवजणेचे 3.57 लाख लाभार्थी जाले. एका वर्सांत लाभार्थ्यां मदीं 19.45 टक्क्यांनी वाड जाली. राज्य पांवड्या वेल्या बँक समितीच्या (एसएलबीसी) अहवालांतल्यान ही म्हायती मेळ्ळ्या. सर्वसामान्यांक फावो अशा दरांत जीवन विमो मेळचो हे खातीर केंद्र सरकारान ही येवजण सुरू केल्या.
अहवाला प्रमाण गोंयांत जून 2024 उपरांत हे येवजणेचे लाभार्थी वाडत गेल्यात. जून 2025 अखेरेक गोंयांतल्या राष्ट्रीयकृत बँकांतल्यान सगल्यांत चड 2.70 लाख जाणांनी हे येवजणेचो लाव घेतिल्लो. खाजगी बँकेंतल्यान जीवन ज्योती विमो घेवपाचें प्रमाण सामकें उणें जालां. गोंयच्या 14 खाजगी बँकांनी ह्या येवजणेचो फक्त 19 हजार जाणांनी लाव घेतला. सहकारी बँकांतल्यान 8 हजार 574 जाणांनी जाल्यार लघू वित्त बँकेंतल्यान 399 मनशांनी हे येवजणेचो लाव घेतला.
जीवन ज्योती विमो येवजण मे 2015 वर्सा सुरू केल्ली. हे येवजणे खातीर वर्साक 436 रुपया प्रिमियम भरचो पडटा. हातूंत एका मनशाचो दोन लाख रुपया मेरेनचो विमो देंवयतात. 18 ते 50 पिराय गटांतली व्यक्ती हे येवजणेचो लाव घेवंक शकता.
तशेंच जून 2025 अखेरेक गोंयांत 8.99 लाख जाणांनी प्रधानमंत्री सुरक्षा विमो येवजणे खातीर नोंदणी केल्या. हे येवजणेंत वर्सुकी 20 रुपया भरल्यार दोन लाख रुपया मेरेनचो लाव दिवपी अपघात विमो देंवयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
