भांगरभूंय | प्रतिनिधी
पणजीः शेतांत सौर उर्जे वरवीं शेतकी यंत्रणां चलोवपा खातीरची केंद्रीय प्रधानमंत्री किसान उर्जा सुरक्षा आनी उथ्थान महाअभियान (पीएम- कुसुम) येवजणे खाला गोंयां सावन खूब उणो प्रतिसाद मे़ळ्ळा. ११,९८० सौर उर्जे वरवीं चलपी माक्ना गोंयच्या शेतकरांक हे येवजणेंतल्यान मंजूर जाल्लीं. मात हातुंतलीीं फकत ७८० माक्नां शेतकारांनी घेतल्यांत. हाका उणी मागणी पळोवन केंद्रान फकत ४३ लाख इतलो निधी हे येवजणे खातीर दिला, अशी म्हायती केंद्रीय अक्षय उर्जा मंत्रालयान दिली.
लोकसभेंत लेखी जापेंत म्हायती दितना अक्षय उर्जा मंत्री प्रल्हाद जोशी हांणी सांगलें, शेतकी वेवसायांक सौर उर्जेची जोडणी दिवपा खातीर पीएम- कुसुम ही येवजण मार्च २०१९ वर्सा चालीक लायिल्ली आनी फाटल्या सप्टेंबरांत २०२३ वर्सा ही येवजण सुदारीत केली.
पीए-कुसुम हे येवजणे खाला शेतकार आपले सुवातेंत २ मॅगा वॉट्ट क्षमतेचे सोलर वा अक्षय उर्जा तयार करपी पावर प्लांट बसोवपाक शकता. तशेंच जी वीज हातुंतल्यान तयार जाता ती उरता जाल्यार वीज खात्यांक विकपाक मेळटा. १३ डिसेंबर २०२४ मरेन ९९६१.५० मॅगा वॅट तांकीचीं माक्नां देशभरच्या राज्यांक दिल्यांत.
हे येवजणे अंतर्गत तीन घटक येतात. पयल्या घटकांत अटक- अ खाला १५० मॅगा वॅट क्षमतेची माक्ना मंजुर जाल्यात. पूण हीं माक्नां अजून मेरेन बसोवंक नात. घटक- ब खाला ९०० माक्नां राज्यांच्या शेतकारांक मंजूर केल्ली. तातुंतलीं फकत ८० माक्नां बसयल्यांत. घटक- क खाला ११ हजार माक्ना मंजुर जाल्लीं. तातुंतलीं फकत ७०० माक्नां शेतकरांनी घेतल्यांत.
वाडटे मागणे प्रमाण पीएम-कुसुम ही येवजण चालीक लागता आनी येवजणेच्या मार्गदर्शक तत्वांचे तरतुदी प्रमाण संबंदीत घटकांत एक निश्चित टप्पो साध्य केले उपरांतच राज्यांक केंद्रीय आर्थीक सहाय्य मेळटा. हे येवजणे खाला राज्यांक नोव्हेंबर २०२४ मेरेन फक्त ४३ लाख इतलो निधी फावो जाला
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
