भांगरभूंय | प्रतिनिधी
पणजीः प्रधानमंत्री इंटर्नशीप येवजणे हे केंद्रीय येवजणेक खुब उणो प्रतिसाद मेळ्ळो. हे येवजणे खाला पात्र जाल्ले उमेदवाराक विवीध कंपनींनी इटर्नशीप करपा खातीर ८२ जाणांक संद दिल्ली. मात तातूंतली २१ जाणांनीच इंटर्नशीप करपा खातीर रस दाखयला, अशी म्हायती केंद्रीय कोर्पोरेट वेवहार मंत्रालयान दिल्या.
मंत्रालयान दिल्ले म्हायती नुसार प्रधानमंत्री इंटर्नशिप येवजणे वरवीं पांच वर्सांत १ कोटी युवकांक देशांतल्या पेजाद ५०० कंपनींत इंटर्नशिपची संद दिवप हो ह्या येनजणेचो उद्देश आसा. हे योजणे वरवीं युवकांक १२ म्हयन्यां खातीर वेवसायीक क्षेत्रांतल्या वेगवेगळ्या कामांचो आनी प्रत्यक्ष उद्देगीक वातावरणाचो अणभव मेळटलो. ही येवजण भारतांतल्या सगळ्या राज्यांनी आनी केंद्रशासीत प्रदेशांनी सुरू आशिल्ल्या हेर खंयच्याय कुशळाटय उदरगत विकास, एप्रेन्टीशीप वा विद्यार्थी प्रशिक्षण उपक्रमा परस वेगळी आसा आनी ती स्वतंत्रपणान चलतली.
इंटर्नशिपचो काळ १२ म्हयन्यांचो आसा. ह्या काळांतलो उण्यांत उणो अर्दो वेळ प्रत्यक्ष कामाच्या सुवातेर दिवप सक्तीचें आसा. इटर्नशीप करपी लावार्थ्यांक दर म्हयन्याक रु. ५ हजार इतलें मानधन मेळटा. तातूंतले रु. ४,५०० भारत सरकार आनी रु. ५०० कंपनी दिता. खर्चा खातीर एका खेपेच रु. ६००० इतले अनुदान मेळटा. दरेक इंटर्न खातीर भारत सरकारा वतीन ‘प्रधानमंत्री जीवन ज्योती विमा योजना’ आनी ‘प्रधानमंत्री सुरक्षा विमा येवजण’ खाला विमा कवच दिता.
हे येवजणे खातीर इंटर्नशीप करपा खातीर ३८४ उमेदवारांनी अर्ज केल्ले. ह्या अर्जा खातीर सलग्न आशिल्ल्या कंपनीनी ८२ उमेदवारांक नोकरी करपाची संद दिल्ली. मात फकत २१ जाणांनी ही संद स्विकारल्या. जाल्यार २४ मार्च २०२६ मेरेन एकाच उमेदवारान इंटर्नशीप पुराय केल्या.
हे येवजणेची अंमलबजावणी दोन पांवड्यांनी जाता. पयल्या पांवड्यांत १३२ उमेदवारांचे अर्ज आयिल्ले आनी २८ उमेदवारांची निवड जाल्ली. जाल्यार दुसरे पांवड्यार २५२ अर्ज आयिल्ले आनी ५४ जाणांची निवड जाल्ली.
उत्तर गोंय
पांवडो उमेदवारी अर्ज निवड केल्ले उमेदवार
पयलो ५४ १३
दुसरो ११३ २३
दक्षीण गोंय
पांवडो उमेदवारी अर्ज निवड केल्ले उमेदवार
पयलो ७८ १५
दुसरो १३९ ३१
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
