पीएफ, हेर विशय सुटावे करात नाजाल्यार संपाक तोंड दियात

भांगरभूंय | प्रतिनिधी

कदंब येरादारी महामंडळाच्या कर्मचाऱ्यांची शिटकावणी

भांगरभूंय । प्रतिनिधी
पणजीः कदंब येरादारी महामंडळाची 34 म्हयन्यांची थकबाकी आसा ती बेगीन दिवची. तशेंच प्रोव्हीडंट फंड उणो करून 10 टक्के केल्लो तो परत 12 टक्के करचो, ह्यो मागण्यो घेवन आमी सरकारा कडेन वतात, पूण अजून मेरेन न्याय मेळना. आमी सरकारांक 21 दिसांची मुजत दितात नाजाल्यार सगळ्यो कदंब बसी बंद करून महामंडळाचे कर्मचारी संपाचेर वतले, अशी शिटकावणी कदंब येरादारी महामंडळाच्या कर्मचाऱ्यांनी दिली.
आपल्यो मागण्यो पुराय करपा खातीर कदंब येरादारी महामंडळाच्या कर्मचाऱ्यांनी पणजे शारांत रेली काडली. ह्या वेळार उलयतना आयटकचे ख्रिस्तोफर फोन्सेका हांणी सांगलें, हे कर्मचारी बरेच फावटी मेळ्ळ्यात. कदंबच्या संचालक मंडळाक आनी अध्यक्षा वांगडा मुख्यमंत्री डॉ. प्रमोद सावंत हांचे कडेन आपल्यो मागण्यो मांडल्यात, पूण आयज मेरेन कसलोच विशय सुटावो जांवक ना.
आमची 34 म्हयन्याची थकबाकी आजून दिवची आसा. 1 जानेवार 2016 आनी 31 आॅक्टोबर 2018 हांचे मदीं 600 वयर कामगार निवृत्त जाले. ते थकबाकी मेळटले म्हूण आशेन रावल्यात. कदंबाच्या कर्मचाऱ्यांक 12 टक्के प्रोव्हीडंट फंड मेळटालो आनी 2019 त आमच्या वट्ट पगाराचेर कदंबान आपलें योगदान पीएफांत रद्द करून 10 टक्क्यांचेर हाडून आमचेर अन्याय केलो. 5 वर्सां जाल्यात तांका सासणा खातीर आस्पावन घेवपाचें आश्वासन दिल्लें. पूण हे विशींची फायल भोंवत आसा, अशें फोन्सेका हांणी सांगलें.
पीएफ आसात ते परत वाडोवन 12 टक्के करता आनी पीएफची उरिल्ली थकबाकी आसा ते दिवपाचे आश्वासन फाटी मुख्यमंत्र्यांनी दिल्ले. आमी परत परत पत्रां बरोवन तांका उगडास करून दितात, तांका मेळून विनंती करपाक सोदतां, पूण तांची भेट मेळना.
जर आमचे प्रश्न सुटावे जायनात जाल्यार बेमुजत संप करपाचो आमी निर्णय घेतला. आमी सरकाराक 21 दिसांची मुजत दिता जर 19 मार्च मेरेन आमच्यो मागण्यो पुराय जायनात जाल्यार कामगार रस्त्यार देंवतले, पुराय कदंब सेवा बंद करून उडयतले. तशेंच लायटीर चलपी बसी आनी हेर सगळ्यो बसी आमी बंद करून उडयतलें, अशी शिटकावणी तांतूत कदंब कर्मचारी ना. हेर सगळ्यो खाजगी कंत्राटदार चलयतात. येरादारी संचालक आनी अधिकारी कदंबाक काबार करपाक भायर सरल्यात देखून आमी खाजगी करणाचो विरोध करतात. जे खाजगी कंत्राटदार आसात ते आपल्या ड्रायव्हरांक 12 वरां बस चलोवपाक लायतात. ह्या 12 वरां कामाचो आमी निशेध करतात, अशें फोन्सेका हांणी म्हणलें.
22 जानेवारीक कदंब मुख्यालयाचेर धरणे धरून जे मुद्दे आमी मांडिल्ले ते पुराय करपाची आमी मागणी करतात आनी नवे कांय मागनात, अशें कदंब कामगार संघटनेचे अध्यक्ष चंद्रकांत चोडणकार हांणी सांगलें.
आमचीं कामां पळोवन वेवस्थापन आनी सरकार फाट थोपटयता पूण ह्यो सगळ्यो पोक्यो फुगोट्यो. हेर खात्यांनी 7 वो आयोगाचो पगार आनी थकबाकीचो लाव घेतलो. 8 वो आयोग येवपाक आठ म्हयने उरल्यात देखून बेगीतल्या बेगीन ही थकबाकी दिवची, अशी मागणी चोडणकार हांणी केली.