भांगरभूंय | प्रतिनिधी
पीएफ मान्य ना करप हें ‘बेशिस्त, बंडखोरी’ बी मानूंक फावना वा फुडल्या वर्सा खातीर कंत्राट नुतनीकरणाचेर ताचो परिणाम जावंक फावना.
हालींच गोंय सरकारान ‘कर्मचाऱ्यांची नोंदणी मोहीम – 2025’ खाला कंत्राटी (काॅण्ट्रेक्ट) आनी व्याख्यान (लेक्चर) तत्वा वयल्या कर्मचाऱ्यांक पीएफाच्या (प्रोव्हीडंट फंड) व्याप्ती खाला हाडपाचो निर्णय घेतला. उच्च शिक्षण संचालनालयाक आनी ताचे कडेन संबंदीत आशिल्ल्या सगळ्या सरकारी आनी सहाय्यक महाविद्यालयांकय हो आदेश लागू जाता. कर्मचाऱ्यांच्या फुडारा खातीर हें एक व्हडलें पावल अशें दिसता, पूण वास्तव म्हणल्यार ‘भुके पोटार जिविताचो विमो करपा’ सारकें.
फाटलीं 15 वर्सां गोंयच्या महाविद्यालयांनी लेक्चर/ कंत्राटी तत्वाचेर नेमणूक जाल्ल्या कर्मचाऱ्यांची एक व्हड समस्या आसा— पगाराक 6 ते 7 म्हयने कळाव जाता. जेन्ना जेन्ना आमी वासपूस करतात तेन्ना ही ‘प्रशासकी समस्या’ आशिल्ल्याचें सांगतात. व्हडलो प्रस्न म्हणल्यार ‘वेवस्था’ पगार सोडपाक (रिलीज करपाक) इतली मंद आसा जाल्यार पगार कपाती (पीएफ कपात) खातीर तीच पद्दत इतली सुपरफास्ट कशी जाली?
सरकार 15 वर्सांत वेळार पगार दिवपा खातीर कसलेंच ‘सॉफ्टवेअर’ वा ‘प्रक्रिया’ तयार करूंक शकलो ना, पूण पयशे कपात करपाचो नवो नेम माक रोखडोच, फटाफट चालीक लायलो ही शोकांतिका न्हय?
कर्मचाऱ्यांक निवड करपाक मेळटा अशें सरकार म्हणटा. पूण महाविद्यालयांतली वास्तवीकता वेगळी आसा. हांगा ‘मौन आनी अलिखीत दबाव’ जाणवता. लेक्चर/ कंत्राटी तत्वाचेर नेमणूक जाल्ल्या प्राध्यापकांक नोकरी तिगोवन दवरपाच्या भयान आयिल्लो आदेश धर्म कसो पाळचो पडटा. पीएफ फॉर्म भरपाक तो फाटीं सरलो वा ‘तांत्रिक प्रस्न’ मांडलो जाल्यार प्रशासन ताका ‘बिगर सहकारी’ मानतलें असो भंय ताका आसातलो. देखून ताका पयशांची सामकी गरज आसली तरीं तो शांतपणान पगार कपात करपाचेर हयकार दाखयतलो. ही ‘सहमती’ न्हय, तर ‘सक्ती’.
जुलय म्हयन्यांत नेमणूक जाले उपरांत फुडले 6- 7 म्हयने पगार नाशिल्ल्यान प्राध्यापकांचेर पयलींच रिणाचो आनी व्याजाचो भार पडटा. निमाणे तो पगार येता तेन्ना 12% कापप हें ताच्या कुटुंबा खातीर एका व्हड अरिश्टा वरींच आसतलें. फुडारा खातीर दोन पयशे एकठांय करून दवरप ही मोख आसता, पूण वर्तमानांत स्वताक उपाशी दवरून न्हय.
सरकारा कडेन आमची नमळायेची विनवणी आसा, धोरण चालीक लावचे पयलीं कांय मुद्द्यांचेर विचार करचो. पीएफ कपात सुरू जावचे पयलीं दर म्हयन्याच्या 5 तारखे मेरेन पगार दिवपाची खात्री सरकारान करची. पीएफ येवजणेंतल्यान भायर सरपा खातीर कर्मचाऱ्यांक वास्तव पर्याय दिवपा खातीर महाविद्यालयांक स्पश्ट सुचोवण्यो दिवच्यो. पीएफ मान्य ना करप हें ‘बेशिस्त, बंडखोरी’ बी मानूंक फावना वा फुडल्या वर्सा खातीर कंत्राट नुतनीकरणाचेर ताचो परिणाम जावंक फावना.
2017 वर्सा सावन लागू जावपी ह्या नेमा खाला, केंद्र सरकाराचे येवजणेंत दिल्ल्या प्रमाण, फाटल्या 8 वर्सांचो ‘कर्मचाऱ्यांचो वांटो’ आमच्या सद्याच्या पगारांतल्यान काडूंक फावना. सरकाराच्या येवजण्यांक येवकार दितना सरकारान लोकांच्यो समस्या मतींत घेवन येवजण्यो आखल्यार सरकाराचे यत्न चड प्रभावी जातले आनी ताचें यश सामान्या मेरेन पावतलें.
– एक महाविद्यालयीन कंत्राटी प्राध्यापक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
