भांगरभूंय | प्रतिनिधी
संवसारीक टी-20 क्रिकेट सर्तींतली दुसरी मॅच जोड आयोजक वॅस्ट इंडीज आनी पापुआ न्यू गिनी (पीएनजी) हांचे मदीं जातली. मॅच हांगाच्या प्रॉव्हिडॅन्स स्टेडियमाचेर जातली.
दोनूय पंगडां मदीं ही पयली आंतरराष्ट्रीय मॅच आसा. पूण, पीएनजी दुसरे खेपे संवसारीक टी-20 सर्तींत खेळटा. 2021तले संवसारीक टी-20 सर्तींत ताणें वांटो घेतिल्लो. त्या वेळार ताका गट पांवड्या तिनूय मॅचींनी हार घेवची पडिल्ली. पीएनजीन आशिया-पॅसिफीक पात्रताय फेरयेंत 6तल्यो 6 मॅची जिखून आनी चार पंगडां मदीं पयली सुवात मेळोवन ताणें संवसारीक टी-20 सर्तींत खेळपाची पात्रताय मेळयिल्ली. मार्च म्हन्यांत नेपाळ आनी हॉंगकॉंग हांचो आस्पाव आशिल्ली तिरंगी माळ खेळिल्ली. फायनलींत नेपाळ पंगडाक 86 धांवड्यांनी हारोवन ताणें वस्तादपण जोडिल्लें.
ते उपरांत मलेशिया आड दोन मॅचींची माळ 1-1 अशी बादाबाद दवरिल्ली. पूण, संवसारीक टी-20 सर्तीच्या सरावाच्या मॅचींनी ताका बरें प्रदर्शन करपाक जमूंक ना. ओमान आनी नामिबिया ह्या पंगडां आड ताका हार घेवची पडिल्ली.
दुसरे वटेन वॅस्ट इंडीज फॉर्मांत आसा. हालींच दक्षीण आफ्रिके आडची तीन मॅचींची टी-20 3-0 फरकान जिखिल्ली. फाटले संवसारीक टी-20 सर्ती उपरांत तो भारत, इंग्लंड आनी दक्षीण आफ्रिका ह्या पंगडां आड खेळ्ळा आनी तांच्या आडच्यो माळो लेगीत जिखला. फकत ऑस्ट्रेलिये आडचे टी-20 माळेंत ताका जैत जोडपाक जमूंक ना.
आंद्रे रसेल आनी निकोलस पुरन हे वॅस्ट इंडिजाचे मुखेल बॅट्समन आसात. हालींच सोंपिल्ले आयपीएलांत दोगांयनी जबरदस्त प्रदर्शन केल्लें. आयपीएलांतलो फॉर्म संवसारीक टी-20त लेगीत कायम राखपाचो तांचो यत्न आसतलो.
दुसरे वटेन टॉनी उरा पीएनजीचो उत्कृश्ट बॅट्समन आसा. 2022चे संवसारीक टी-20 सर्ती सावन ताणें 151चे स्ट्रायक रेटीन 416 धांवड्यो केल्यात. ताच्याच प्रदर्शना नेटार पीएनजी पात्रताय फेरीय सयत दोन व्हड सर्ती जिखपाक येसस्वी थारिल्लो. बॉलींग विभागाची भिस्त जॉन करिकोचेर आसतली. ताणें 16 मॅचींतल्यान 25 विकेटी घेतल्यात. स्पिनर चार्ल्स अमिनीन 18 विकेटी घेतल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
