भांगरभूंय | प्रतिनिधी
नागरी पुरवण खात्याची म्हायती
गोंयभर घालतले भुंयगत पायपलायन
खातें पळयता सरकारी मान्यतायेची वाट
भांगरभूंय । प्रतिनिधी
पणजी : गोंयांत पायप नॅचरल गॅसीचे (पीएनजी) जाळे पुराय गोंयभर घालतले. हे पीएनजीची भुंयगत पायपलायन सुविधेचें काम सुरू करपा खातीर प्रस्ताव तयार जाला. एकदा ह्या प्रस्तावाक मान्यताय मेळ्ळे उपरांत पीएनजी पायप घालपाचें काम झुजा पांवड्यार सुरू जातलें, अशी म्हायती नागरी पुरवण खात्याच्या वरिश्ठ अधिकाऱ्यान दिली.
हालींच नागरी पुरवण खात्यान एक भौशीक कळोवणी जारी करून कळीत केल्लें, ज्या वेवसायीक आस्थापनां कडेन पीएनजी सुविधा आसा वा जर तांणी पीएनजी जोडणी खातीर अर्ज करून सुविधा तयार जाले उपरांत पीएनजी जोडणी खातीरचे हमीपत्र दिलां आसत जाल्यारूच तांकां वाडीव 40 टक्के सिलिंडर कोटाचो लाव मेळटलो. हे पीएनजी कनेक्शन दरेका घरांनी तशेंच आस्थापनांनी अस्तिवांत येवचें हे खातीर नागरी पुरवण खात्यान काम हातांत घेतलां.
पीएनजी कनेक्शन आनी सुविधा उबारपा खातीरचो प्रस्ताव आशिल्ली फायल आमी तयार केल्या. हे फायलीक मान्यताय मेळ्ळे उपरांत रोखडेच संबंदीत खातीं देखीक, भौशीक बांदकाम, पालिका, पंचायत हांकां थेट निर्देश धाडून पीएनजी पायपलायन घालपा खातीर परवानगी दिल्या अशें मानून घेवचे, अशें निर्देश वतले, अशें अधिकाऱ्यान सांगलें.
पुराय गोंयभर दरेका शारांत तशेंच गांवांनी भुंयगत गॅस पायपलायनी घालून घराघरांनी पीएनजी कनेक्शन दितले. सद्या हे फायलीचेर प्रक्रिया चालू आसा. एकदां हे फायलीक मान्यताय मेळ्ळे उपरांत भुंयगत पायपां घालपाचें काम झुजा पांवड्यार 24 वरां खातीर सुरू जातले. सद्या पणजी, फोंडें, कुंडय, मडगांव ह्या सुवातांनी पीएनजी पायपलायन पावून गॅस पुरवण चालू आसा, अशी म्हायती अधिकाऱ्यान दिली.
गोवा नॅचरल गॅस, अदानी गॅस हांची जापसालदारकी
गोंयभर भुंयगत पीएनजी पायपलायन घालून तांचीं कनेक्शनां दिवपा सयत पीएनजी गॅसीची पुरवण करप हें काम गोवा नॅचरल गॅस प्रा. लि. तशेंच इंडियन ऑयल अदानी गॅस प्रा. लि. हांची जापसालदारकी आसतली. सरकार फक्त तांकां परवानगी दितलें. तशेंच पणजी ते म्हापशें मजगती पायपलायन पुला वयल्यान वा उदका पोंदच्यान घालप हो एक विशय जावन रावला. हे खातीर खाशेली परवानगी जाय, अशें अधिकाऱ्यान म्हणलें. गोवा नॅचरल गॅस उत्तर गोंयांत आनी अदानी गॅस दक्षीण गोंय तशेंच कुशावती जिल्ह्यांत एनजीची पुरवण करतले.
हॅल्पलायन नंबर करतले जारी
फुडाराक पीएनजी कनेक्शन आशिल्ल्या आस्थापनांक वाडीव कोटा मेळटलो. तशेंच घरगुती सिलिंडरांच्या उणावाक लागून पीएनजी कनेक्शन घेवचे असो उलो नागरी पुरवण खात्यान मारले उपरांत पीएनजी सुविधेक अर्ज खंय करप हे विशीं लोकां मदीं संभ्रम निर्माण जालो. हे विशीं स्पश्टीकरण दितना अधिकाऱ्यान सांगलें, लोकांचे प्रस्न सुटावे करपा खातीर खातें हॅल्पलायन नंबर जारी करतले. हे विशींचो आदेश सोमारा जारी करतले. लोकांनी आपले समस्येचें निवारण हे हॅल्पलायनीचेर करचें तशेंच लागींच्या नागरी पुरवण खात्याक भेट दिवची, अशें अधिकाऱ्यान म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
