पीआय नायक हांचें निलंबन करून कारवाय करात

भांगरभूंय | प्रतिनिधी

गोंय कॅथलीक संघटणेची डीजीपी कडेन कागाळ

पणजीः कोलवा इगर्जेंत पुलिसांनी फौज घेवन वचून पाद्री व्हीगार हांकां दोन वरां खातीर कोंडून दवरप हें कायदाचें उल्लंघन आसा. पुलीस महासंचालकांनी हाची दखल घेवन पुलीस निरिक्षिक विक्रम नायक हांकां निलंबीत करून तांचेर कायदेशीर कारवाय करची, अशी मागणी गोंय कॅथिलक संघटणेचे अध्यक्ष सीरील फर्नाडीस हांणी केल्या.

कॅगान कोलवा इगर्जेंत जाल्ले घडणुके संदर्भात कोलवाचे तेन्नाचे पुलीस निरिक्षक कपिल नायक हांचे आड पुलीस महासंचालका कडेन कागाळ दाखल केल्या. कागाळ दाखल केले उपरांत ते उलयताले. ह्या वेळार कॅगचे दक्षीण गोंय उपाध्यक्ष मेल्विन फर्नांडीस हाजीर आशिल्ले.
विक्रम नायक हांणी केल्ले गाळयार्‍या वर्तना आड आमी कागाळ नोंद केल्या. तांणी फेब्रेराच्या १० वेर कोलवा इगर्जेंत बेकायदो प्रवेश करून फादर पोली लोबो हांका दोन वरां खातीर कोंडून दवरला, असो आरोप फर्नांडीस हांणी केलो.
पाद्री व्हिगार हांका चुकीच्या मार्गान कोंडून दवरून पोलिसांनी भारतीय न्याय संहीतेचे तीन कलमांचे उल्लंघन केल्ल्याचें आमी कागाळींत म्हणलां. देखून पुलीस निरिक्षका आड खर कारवाय करून ताच्या निलंबनाची आमी मागणी केल्या. ताची बदली करप ही ख्यास्त न्हय. कायदो मोडिल्ल्यान ताका ख्यास्त ही जावपाक जाय. जर पुलीस कायदे मोडपाक लागले जाल्यार लोकांनी कोणाकडे न्याय मागप, असो प्रस्न फर्नांडीस हांणी केलो.
खंयच्या कलमा खाला पुलीस निरिक्षकान गुन्यांव घडोवन हाडला तें आमी कागाळींत नोंद केला. कलम १२७ खाला तांणी दोन वरां खातीर कोंडून दवरला. कलम १९८ खाला सरकारी कर्मचार्‍यान कायद्याक पाळो दिनासतना आपल्या हक्कांचो गैरवापर केला. कलम ३५१ खाला तांणे धमकोवपाचो यत्न केला. तो इगर्जेंत एकटोच वचूंक ना तांणे आपल्या वांगडा २० जाणांची पुलीस फौज व्हेल्या. पाद्रीक मेळपाक व्हडा प्रमाणांत पुलिसांची फौज वयता हें आमी पयलेच खेप आयकलां, अशें फर्नांडीस हांणी म्हणलें.
नायक हांकां निलंबीत करून ह्या तीन कलमा खाला तांचेर एफआयआर नोंद करचो. ही गुन्यांवकारी घडणूक करपा फाटल्यान पुलीस निरिक्षकांचो गुपीत हेतू आसपाक शकता. आमकां न्याय जाय. आमचे धर्म गुरू कसलोच तेंको आनी राखण नासतना उरपाक जायना. आमी कॅग हांचे वांगडा सदांच उबे आसतले, अशें फर्नांडीस हांणी सांगलें.