भांगरभूंय | प्रतिनिधी
सांखळेच्या संवेदन केंद्रा वतीन आयाेजन
केरी-सत्तरी: वानरमारी म्हूण वळखतल्या निरंकाल फोंडेंच्या कातकरी आदिवासी भुरग्यांच्या शिक्षणीक उदरगती खातीर राबयतल्या कातकरी प्रकल्पा खाला 10 दिसांचें शिक्षण संस्कार राबितो शिबिराक पिसुर्ल्यां सरकारी माध्यमीक विद्यालयांत हालींच सुरवात जाली. सांखळेंतल्या संवेदन केंद्रा वतीन हो प्रकल्प राबोवन तांणी ह्या शिबिराचें आयोजन केलां.
ह्या शिबिराचें उक्तावण दक्षीण गोंय जिल्होधिकारी गुरुदास देसाय, सरकारी माध्यमीक विद्यालय अडवयच्यो मुख्याध्यापिका आजरा अन्सारी, ज्येश्ठ नागरीक सतीश सबनीस, सरकारी माध्यमीक विद्यालय पिसुर्लेंचे मुखेल शिक्षक नंदा माजीक, संवेदन केंद्राचे अध्यक्ष माधवी पाटील राणे बी मानेस्त हाजीर आशिल्ले.
ह्या वेळार मानेस्तांचे हस्तुकीं कुंडेंत कड्डण रुजोवणेक उदक घालून आनी कातकरी भुरग्यांच्या हातांत इश्टागतीचें धागो बांदून उक्तावण केलें.
ह्या वेळार गुरुदास देसाय हांणी सांगलें, मागास उरिल्ल्या कातकरी समाजाच्या भुरग्यांक शिक्षणा खातीर प्रामाणीक यत्न करपी संवेदन केंद्राच्या कार्याची तोखणाय केली. संवेदन केंद्राच्या यत्नान हो समाज शिक्षीत जाला आनी तांची भुरगीं शिक्षणांत पर्जळ्ळीं जाल्यार एक मोटें कार्य थारतलें अशें तांणी म्हणलें.
ह्या वेळार सतीश सबनीस हांणी कातकरी समाजाची जायत आशिल्ली उदरगत खूब बरी आसून संवेदन केंद्राचो हातूंत मोटो वांटो आसा अशें म्हणलें.
आजरा अन्सारी हांणी आपूण अशा संस्थांक मजत करप म्हणल्यार मागास उरिल्ल्या समाजाच्या शिक्षणीक विकासा खातीर गुंतवणूक करपा सारकें आशिल्ल्याचें सांगलें.
नंदा माजीक हांणी शिक्षणांत मागास आशिल्ल्या समाजाच्या शिक्षणीक उदरगती खातीर आरंभ केल्लें कार्य खूब कठीण आसा ते खातीर तांची तोखणाय केली.
ह्या वेळार नमन सावंत हांणी येवकार दिवन प्रास्तावीक करतना संवेदन केंद्रा वतीन राबयतल्या कामाची म्हायती दिली. जाल्यार बाबनी मापारी हांणी राबितो शिबिराची रुपरेखा सांगली.
कार्यावळीचें सुत्रसंचालन कविता मयेंकार हांणी केलें जाल्यार स्नेहा गांवस हांणी उपकार मानले.
ह्या वेळार गणपत पार्सेकार शिक्षण म्हाविद्यालयाचे प्राध्यापक खुशाली प्रभू आनी तांचे कांय विद्यार्थी, समाजीक कार्यकर्त्यो स्नेहा सबनीस, शिक्षक बेबीनाझ अन्सारी, प्रगती नायक तशेंच संवेदन केंद्राचे कार्यकर्ते व्हड संख्येन हाजीर आशिल्ले.
दीसपट्टे चलतात शिकवणी वर्ग
ह्या शिबिरांत कातकरी भुरग्यांचेर शिक्षण संस्कार जावचे तशेंच अक्षर वळख नाशिल्ल्या विद्यार्थ्यांक अक्षर वळख करून दिवप आनी ज्या भुरग्यांक बरोवंक, वाचूंक येता तांचे खातीर आनीक समृद्ध करपा खातीर दीसपट्टे सकाळच्या सत्रांत शिकवणी वर्ग चलतात. हे खातीर कृतियुक्त आनी आनंददायी शिक्षण पद्दतीचो वापर करतात.
संवेदन केंद्राचे कार्यकर्ते आनी गणपत पार्सेकार शिक्षण म्हाविद्यालयाचे विद्यार्थी हे वर्ग घेतात. जाल्यार सांजवेळच्या सत्रांत कातकरी भुरग्यांक ‘लेझीम’ हो परंपरीक प्रकार शिकयतात. हे खातीर इचलकरंजी हांगासरले रोहीत दळवी आनी वैभवी आढाव हे कला प्रकार शिकयतात. तेच बरोबर कुशळटाय विकास राबोवपी विवीध कार्यावळी घेतात. कातकरी भुरग्यांच्या शिक्षणा खातीर हेर समाजाच्या कांय समन्वयीन भुरग्यांचो पीयर गट म्हूण वापर करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
