भांगरभूंय | प्रतिनिधी
गुजरात अबकारी खात्या कडल्यान 11 वरां कारवाय; कागदपत्रां जप्त
वाळपय: अबकारी खात्याच्या मार्गदर्शक तत्वांची अंमलबजावणी न करप हाचो ठपको दवरून गुजरात अबकारी खात्याच्या अधिकाऱ्यांनी पिसुर्ल्यां आशिल्ल्या गलेस्टॉर्म डिस्ट्रलरी प्रायव्हेट लिमिटेड ह्या सोऱ्याचे कंपनीक सील मारलें. ही कारवाय मंगळारा रातीं उसरां मेरेन सुरू आशिल्ली ती बुधवारा फांतोडेर थांबयली.
अजापाची गजाल म्हणल्यार वाळपय अबकारी खात्याच्या अधिकाऱ्यांक हाची कसलीच सुलूस लागली ना. पूण कचेऱ्याच्या कर्मचाऱ्यांक बराबर घेवन गुजरात अबकारी खात्याच्या अधिकाऱ्यांनी ही कारवाय केल्ल्याची म्हायती हाताक लागल्या.
हे विशींची म्हायती अशी की, सुमार 15 दिसां पयलीं सदर कंपनीचो सोरो गुजरातांत धाडिल्लो. हो म्हाल धाडटना गरजेची जतनाय घेवंक नाशिल्ली. गुजरात अबकारी खात्याच्या मार्गदर्शक तत्वांची अंमलबजावणी करूंक नाशिल्ली. धाडिल्ल्या सोऱ्याच्या बाटल्यांचेर गरजेची म्हायती दिवप बंधनकारक आसता. पूण ताची अंमलबजावणी जावंक नाशिल्ली.
ह्या म्हालाची चवकशी केले उपरांत तातूंत फेरफार आशिल्ल्याचें दिसून आयलें. हाका लागून ह्या सोऱ्याच्या म्हालाचेर कारवाय केली. लाखांनी रुपयांचो म्हाल गुजरात अबकारी खात्याचे यंत्रणेन जप्त केल्लो. ते विशींची कारवाय फाटले पंदरा दीस सुरू आशिल्ली. ह्या प्रकरणांत गुजरात अबकारी खात्याच्या अधिकाऱ्यांनी वाहनाच्या ड्रायव्हराक ताब्यांत घेतला. ताचे कडल्यान पुराय म्हायती समजून घेतली अशें अधिकाऱ्यां कडल्यान कळटा.
अदीक तपासणे खातीर ह्या प्रकरणाची गुजरात अबकारी खात्याच्या अधिकाऱ्यांनी खोलायेन चवकशी केली तेन्ना वाहन ड्रायव्हराक घेवन मंगळारा सांजवेळा गुजरातचो अबकारी खात्याचो पंगड गोंयांत पावलो. तांणी गोंयच्या अबकारी खात्याच्या वाळपयच्या कर्मचाऱ्यांक बराबर घेतले आनी पिसुर्ल्यां कंपनीच्या कारभाराचेर धाड घाली. ह्या वेळार खोलायेन तपासणी केली. गरजेचीं आशिल्लीं कागदपत्रां कंपनीन दिली नात, म्हणून कंपनी सील करपाची कारवाय केल्ल्याची म्हायती आसा.
गुजरातचो पंगड गोंयांत
मेळिल्ले म्हायती प्रमाण मंगळारा सांजवेळा स वरांच्या सुमाराक ही कारवाय हातांत घेतिल्ली, ती बुधवारा फांतोडेर 5 वरां मेरेन ती चल्ली. ह्या वेळार कंपनीच्या मुखेल दाराक कुलप मारिल्ल्याची म्हायती मेळ्ळ्या.
गोंयचे थळावे अधिकारी काळखांत
हे विशीं अदीक म्हायती समजून घेवपा खातीर वाळपय अबकारी खात्याच्या निरिक्षकां कडेन संपर्क सादलो तेन्ना तांणी हे विशीं आपल्याक कसलीच म्हायती नाशिल्ल्याचें सांगलें. ही कारवाय गुजरात पंगडान केली. गुजरात अबकारी खात्याच्या मार्गदर्शक तत्वांक पाळो दिवंक नाशिल्ल्यान ही कारवाय केल्ल्याचें तांणी सांगलें. भायल्या राज्यांतलो अबकारी खात्याचो पंगड राज्यांतल्या खंयच्याय वाठारांत धाड घालपा खातीर येत जाल्यार तांकां स्वतंत्र अधिकार आसात अशें निरिक्षकान सांगलें. थळाव्या अधिकऱ्यांक विस्वासांत घेवप अशे कसलेच तरेचें बंधन नाशिल्ल्याचें ह्या अधिकाऱ्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
