भांगरभूंय | प्रतिनिधी
भांगरभूंय । प्रतिनिधी
पर्वरीः पिळर्ण-मार्रा पंचायतीन 2022-23 वर्सा सगल्यांत चड घरपट्टी वसुली केल्ले खातीर राज्यांतली उत्कृश्ट पंचायत हो पुरस्कार फावो जालो. पंचायत मंत्री माविन गुदिन्हो हांचे हस्तुकीं सरपंच रेश्मा बांदोडकार आनी पंचायत सचीव पीटर मार्टिन्स हांणी तो पंचायत दिसा तो स्विकारलो.
पंचायत वाठारांतले लोक आनी आस्थापना आपली वर्सुकी घरपट्टी नेमान भरतात. पंचायत मंडळाक पुरस्कार मेळपाक तांचे व्हड योगदान आसा अशें उपसरपंच अजय गोवेकारान सांगलें. पर्वरी पठारार रावपी लोकांक घरपट्टी भरपाक पंचायत कार्यालयांत येवप कुस्तार जाता. ते खातीर वर्सांत दोन खेप पंचायत कर्मचारी थंय येवून लोकां कडल्यान घरपट्टीचे पयशे घेतात अशी म्हायती ताणे दिली.
घरपट्टी आनी हेर करांची वसुली वेळच्या वेळार जाल्ल्यान पंचायतीचे तिजोरेंत पयशे आसतात आनी पंचायत वाठारांतल्या उदरगती खातीर सरकारी निधीची वाट पळयनास्तना आमी पंचायत निधींतल्यान काम करतात. हालींच पंचायत निधींतल्यान 90 लाख रुपया खर्च करून पंचायत कार्यालया लागच्या मैदानार आमी लॉन घालपाचें काम पुराय केलां अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
