भांगरभूंय | प्रतिनिधी
पणजी : पिळर्ण- कांदोळेच्या रस्त्यार एके बायलेचो अश्लील हावभाव आनी शब्दांतल्यान विनयभंग केल्ल्याची धक्को दिवपी घडणूक उक्ती जाल्या. ह्या प्रकरणांत पिडेस्त बायलेन दिल्ले कागाळी वेल्यान साळगांव पुलिसांनी दुबावीत सलील साळगांवकार (रा. मार्रा- पिळर्ण) हाचे आड भारतीय न्याय संहितेच्या विवीध कलमां खााला गुन्यांव नोंद केला. ही घडणूक शुक्रारा २० फेब्रुवारी २०२६ दिसा रातच्या सुमार पावणे धा ते इकरा वरांचेर घडली.
चड म्हायती प्रमाण, कागाळदार बायल शुक्रारा आपल्या घरा भायर आसतना दुबावीत सलीलान तिका पळोवन बुरश्या उतरांचो वापर केलो. इतल्याचेरूय थारनासतना दुबावितान अश्लील हावभाव करून विनयभंग केलो. पिडेस्तान ह्याय पयलीं अशे तरेच्यो कागाळी पुलिशेंत दिल्ल्यो मात ताचेर कारवाय जावंक़ ना. निमाणें साळगांव पुलीस स्टेशनाच्या निरीक्षकां कडेन चर्चा केलेे उपरांत आनी प्रकरणाची खरसाण लक्षांत घेवन पुलिसांनी सलील साळगांवकार हांचे आड बीएनएस कलम ७९ आनी ३५२ खाला गुन्यांव दाखल केला.
ह्या प्रकरणांत एफआयआरची प्रत म्हापशेंच्या प्रथम वर्ग न्यायालयांत आनी वरिश्ठ पुलीस अधिकार्यां कडेन सादर केल्या. हे घडणुकेची म्हायती मेळटांच पणजी आनी पर्वरेच्या नियंत्रण कक्षाकूय संदेश धाडला. सध्या साळगांव पुलीस ह्या प्रकरणाचो अदीक तपास करतातो तशेंच दुबावितांचेर खर कारवाय करपाची मागणी थळावे नागरीक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
