भांगरभूंय | प्रतिनिधी
म्हापशें: पिळर्ण उद्देगीक वसणुके मुखार म्हाल व्हरपी पिकपीन चिड्डिल्ल्यान दुचाकी चालक आवय आनी पूत गंभीर जखमी जाले. जखमीं मदीं नेर्ला हांगासरली निता कळंगूटकार (54) आनी रोहन कळंगूटकार (29) हांचो आस्पाव आसून तांचेर गोमॅकाँत उपचार सुरू आसात.
हो अपघात काल (सोमारा) सांजवेळा 3.40 वरांच्या सुमाराक जालो. जीए 05 टी 5846 क्रमांकाची म्हाल व्हरपी महिंद्रा पिकप आनी जीए 03 बीए 0883 क्रमांकाची अॅक्टिवा स्कुटर पिळर्णा सावन साळगांवचे दिशेन वतालीं.
दोनूय वाहनां पिळर्ण उद्देगीक वसणुकेच्या दरवट्या कुशीक पावतकच पिकपीन मुखा वेले अॅक्टिवा स्कुटरीक धपको दिलो. ह्या अपघातांत स्कुटरी सयत दोगूय दुचाकी वेले जखमी जावन पिकपी पोंदा आडकले.
ह्या दोगांकूय पिकप ड्रायव्हर देवर दार (रा. फोंडें) हाणें अपघात थळार जमिल्ल्या जमावाचे मजतीन पिकप रस्त्याचे कुशीक लंवडून जखमी आवय-पुताक भायर काडलीं. रोखडेंच तांकां 108 एम्बुलन्सींतल्यान गोमॅकाँत धाडून दिलीं. थंय तांचेर उपचार सुरू आसात.
अपघाताचो पंचनामो पर्वरीचे पुलीस हवालदार विवेक तोरसकार हांणी केलो. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
