पिळग्यांतर

भांगरभूंय | प्रतिनिधी

चालू काळांत एकाच वांगडा द सायलंट जनरेशन, बेबी बूमर, जनरेशन एक्स, जनरेशन वाय, जनरेशन झी आनी जनरेशन आल्फा अश्यो वेगवेगळ्या काळ खंडांत जल्मल्ल्यो 6 पिळग्यो जियेतात.

प्रतिकूल काळ सशक्त मनशां घडयता, बळिश्ट मनशां अनुकूल काळ निर्माण करतात, अनुकूल काळ अशक्त मनशां घडयता आनी अशक्त मनशां प्रतिकूल काळ निर्माण करतात… नामनेचो अमेरिकन लेखक जी मायकल हॉफ हाच्या “दोज हू रिमेयन” ह्या कादंबरींतलो हो एक फामाद उतारो, विंगड-विंगड पिळगेंत घडटल्या बदलाचें एक अदभूत चक्र आमचे मुखार मांडटा.
पिळगी म्हळ्यार सुमार एकाच वेळार जल्मल्ले आनी जियेवपी सगळे लोक. एका पिळगेचो सरासरी काळ, सादारणपणान सुमार 20- 30 वर्सां मानतात, जातूंत भुरगीं जल्माक येतात, व्हड जातात आनी तांगेर भुरगीं जावंक लागतात. एका पिळगेंतले लोक त्या काळांतल्यो त्योच म्हत्वाच्यो घडणुको अणभवतात. दोन वेगवेगळ्या पिळगेंत फकत पिरायेचें अंतर आसना, तर धारणांचो, मुल्यांचो, मतांचो आनी वागणुकेचो फरक आसता. हे फरक समजुती, राजकारण, भास, काम, सामाजिक मुल्यां कडेन संबंदीत आसूं येतात.
अस्तमते कडल्या देशांतल्या लेखकांनी वेगवेगळ्या काळांत ज्यो पिळगी जियेल्यो तांकां वेगवेगळीं नांवा दिल्लीं आसात. तर तातूंतली कांय पिळग्यांची नांवां अशीं:-

1. द लॉस्ट जनरेशन (शेणिल्ली पिळगी) – जी पिळगी 1883 ते 1900 ह्या काळखंडांत जियेल्या, तांकां “द लॉस्ट जनरेशन” हे नांव अमेरिकन लेखक गरट्रूड स्टीन हिणें दिलां. ती पिळगी पयल्या विश्व महाझुजांवेळावयली, जांणी कल्पने भायलें जिणेंचें लुकसाण तशेंच सामुहीक स्थलांतर पळयलां आनी महाझुजांतल्या त्या अस्थिर काळांत त्या ध्येयहीन जिवीत जियेपाचो अणभव आयला.
2. द ग्रेटेस्ट जनरेशन (व्हडली पिळगी)- 1901 ते 1924 अशें 23 वर्सां मेरेनची ही पिळगी ही ‘ग्रेट डिप्रेशन’ म्हळ्यार महामंदीच्या काळांत जियेली आनी उपरांत प्रौढपणांत चड करून दुसऱ्या म्हाझुजांत झुजली. हे पिळगें मदी नैतिक संघर्श आशिल्लो आनी दर एक सामाजिक पंगड आप-आपले मता विशीं ठाम आसताले. ते वेळार भारत देश पारतंत्र्यांतच आशिल्लो आनी ब्रिटीश राजवटीच्या नेतृत्वाखाला तांकांय म्हाजुझांत झुजचें पडिल्लें. भारताच्या स्वातंत्र्या खातीर झुजपी म्हान नेतेय बी हेच पिळगेंतले.
3. द सायलंट जनरेशन ( मौन पिळगी)1925-1945 ह्या काळांत जल्मल्ली पिळगी दुसऱ्या झुजा उपरांतच्या काळांत तरणाटी जाली. सरकारा आड उलोवपा वा निशेध करपाक सक्षम नाशिल्ल्यान तांकां “मौन”पिळगी म्हणटात. मात्शी करिअर आनी सुरक्षीत घरगुती जिवीत मेळोवपाक लागून ती पिळगी धडपडटाली.
4. बेबी बूमर जनरेशन – 1946-1964 ह्या काळांत जल्मल्ली ही पिळगी. दुसऱ्या म्हाझुजा उपरांत जाल्ल्या व्हड लोकसंख्येच्या भरमसाठ वाडी वयल्यान ‘बेबी बूम’ हें उतर आयलां. . शीतझुज, चंद्राचेर देंवप, व्हिएतनाम झुज आनी नागरी हक्क चळवळ हें ते पिळगेंतल्या काळांतलें. भारतांतूय त्या काळांत स्वातंत्र्योत्तर काळ आशिल्ल्यान लोकांच्या जिवितांत मातशी स्थिरताय येवंक लागिल्ली. ह्या पिळगेंतल्या मनशांनी मेहनतीन नोकरी-वेवसाय करून आपल्या जिवितांत आर्थिक सुबत्ता हाडपाचो यत्न केला आनी आपले फुडले पिळगेक बरे तरेन पालन करपाची जापसालदारकी घेतली.
5. जनरेशन एक्स – कॅनडांतलो लेखक डग्लस कपलँड हांणी जेन एक्स हें नांव हे पिळगेक दिलां. 1965-1980 काळखंडांतल्या हे पिळगेचे जल्म प्रमाण बूमरांच्या तुळेंत खूब उणें आशिल्ल्यान तांकां “बेबी बस्टर” ह्या नांवानय वळखतात. हे पिळगेचें खाशेलपण म्हळ्यार प्रतिक्रियावाद, बंड, आत्मनिर्भरताय आनी संस्थांच्या अधिकाराचेर एकंदर अविश्वास.
6. जनरेशन वाय – 1981-1996 जल्मले आनी 2000 ह्या मिलेनियम वर्सांत प्रौढ जाले म्हणून ह्या लोकसंख्येक चड करून “मिलेनियल” अशेंय म्हण्टात. ह्याच वेळार संवसारात तंत्रगिन्यानात खूब गतीन बदल घडूंक लागिल्ले. तरणाटेपणांत इंटरनॅटाच्या उदरगतींत वांटो घेवपाची संद तांकां मेळ्ळी तशेंच 2007 वर्सा आयिल्ल्या म्हामंदीच्या अर्थीक संघर्शांकय तांकां तोंड दिवचें पडलें .7. जनरेशन झी – 1997-2012 ह्या काळांत जल्मल्ल्या, हे पिळगेक “आय-जेन” अशेंय म्हणटात, कित्याक तर तांचें चडशें जिवीत स्मार्टफोना सारकिल्या वैयक्तीक तंत्रगिन्यानाचो वापर करपांत गेला. सोशल मिडियाच्या आगमन, पर्यावरण संकश्ट तशेंच हेर जायत्या समाजीक समस्यां खातीर जेन झी ही सगळ्यांत उदास पिळगी म्हणूनय पळयतात.
   8.जनरेशन आल्फा— 2013-2025 ह्या काळांत जल्मल्लीं भुरगीं जांकां जनरेशन आल्फा म्हणटात. ही पयली पिळगी भुरगीं, जांकां सोशल मिडिया अस्तित्वांत नाशिल्लो काळ केन्नाच कळचो ना आनी हे पिळगेंतलीं भुरग्यांक आदल्या खंयच्याय पिळगे परस तंत्रगिन्यानांत कितलिशीच फुडें आसा.
   चालू काळांत एकाच वांगडा द सायलंट जनरेशन, बेबी बूमर, जनरेशन एक्स, जनरेशन वाय, जनरेशन झी आनी जनरेशन आल्फा अश्यो वेगवेगळ्या काळ खंडांत जल्मल्ल्यो स पिळग्यो जियेतात. तातूंतलीं सगळ्यांत जाण्टी म्हळ्यार द सायलंट जनरेशन, जातूंतले जायते लोक आतां संवसारांत नात आनी जे आसात ते अति जेश्ट नागरीक म्हळ्यार 80 वर्सा पिरायेवेले आसात. त्या लोकांनी कितलीं स्थित्यंतरा पळयल्यांत आसतलीं. तांचे नदरेंतल्यान आतांचो संवसार कितलो वेगळो आसतलो हे आमी चिंतल्यार आमकां समजतलें की तांकां ह्या तंत्रगिन्यान-संचलीत नव्या संवसारांत जुळोवन घेवपाक कितलो त्रास पडटा आसतलो तो. तांच्या वेळा वयल्यो धारणा, रिती-रिवाज, रुढी, परंपरा आताचे पिळगे परस सामक्यो भिन्न. बेबी बूमर पिळगेंतलींय मनशां आता 60 वर्सां वेल्या पिरायेची जेश्ट नागरीक, म्हणल्यार चडशीं सेवानिवृत्त जाल्लीं आसात.
   जनरेशन एक्स ही चालू काळांत सगळ्यांत चड व्यस्त. तांच्या संस्कारा प्रमाण तीं एका वटेन आपल्या आदल्या पिळगेक म्हळ्यार जाण्ट्या आवय-बापायक साबांळटात तर दुसरे वटेन आपल्या भुरग्यांची उच्च शिक्षण, करियर करपाक धडपडटात वा नातवंडाक तरी सांबांळटात. 28 ते 43वर्सां मदलीं जी पिळगी जनरेशन वाय वा मिलेनियल पिळगी, सध्या आपलें नोकरी, करियर, ल्हान भुरगीं हातूंत मग्न आसात. जेन एक्स आनी वाय ह्या पिळगेंतल्या जिणेंतय तंत्रगिन्यानान नवेंच पावल घाल्ले आशिल्ल्यान, खूब झपाट्यान जावपी बदल तांकां पळोवचे पडल्यात. देखीक टिवी जो पयलीं व्हडलो खोको, कृश्ण-धवल आनी फकत दोन वरां चलपी, तो मागीर रंगीत, फ्लॅट स्क्रीन, चोवीसय वरां चलपी, आनी आतां तर इंटरनेटाचेर चलपी स्मार्ट टिवी जालो. अशे जायते बदल पळयिल्ले त्या दोनुय पिळगेंतले लोक फाटल्यो यादीं काडून सामके भावनीक जातात.
   आल्फा पिळगेंतलीं भुरगीं अजून ल्हान आसात. तांचे विचार, धारणा हे अजून सारकें लक्षांत येवचे नात कारण तांची व्यक्तित्व अजून पुराय विकसीत जावंक ना.
   आतां उरली ती जनरेशन झी पिळगी 12 ते 27 ह्या पिरायेंतली. जाणकारांनी केल्ल्या नियाळाप्रमाण उणी मेहनत आनी चड मजा हो तांच्या जिणेचो फंडा आशिल्ल्यान मना जाय तशें घडना जाल्यार तांच्या मदींय उदासीनताय चड दिसून येता. जेन झी हो आनी तांच्या जिणेंतल्यो समस्या हो एक वेगळोच विशय जावन आसा जाचेर फुडले भागांत पळोवया…

मंजुषा सिनाय तळावलीकार
9822981508