भांगरभूंय | प्रतिनिधी
पणजीः पिलार फादर आग्नेल म्हाविद्यालया लागसारच्या मैदानाचेर आयोजीत केल्ल्या झारखंडी समाजाच्या सांस्कृतीक कार्यावळीक आयोजकांचे वायट वागणुकेक लागून गोंदळ जालो. कार्यावळींक हाजीर आशिल्ल्या लोकांनी मैदानांचेर तोडफोड करून बोवाळ केल्ल्यान परिस्थिती हाता भायर गेली आनी निमाणें पुलिसांनी लाठीमार करुन जायत्या जाणांक ताब्यांत घेतले.
कार्यावळीक हाजीर रावपा खातीर लोकांनी प्रवेश शुल्क म्हणून 300 ते 350 रुपया फारीक केल्ले. पूण मैदानाचेर कार्यावळ वेळार सुरू जावंक ना. आयोजकय गैरहाजीर आशिल्ले. हाका लागून तिडकिल्ल्या लोकांनी गोंदळ घालपाक सुरू केलो. कांय लोकांनी तोडफोड केली.
लाखांचें लुकसाण आनी आयोजक फरारी
तिडकिल्ल्या लोकांनी माचयेर तोडफोड करून सुमार 10 ते 11 लाखांचें म्युझिक सिस्टीम पुरायपणान नश्ट केली. हाचे भायर सेटअप मोडून उडयलो, माची, कदेलांचें लुकसाण केलें आनी कांय कडेन उजो लावपाचोय यत्न केलो. बोवाळ जाताच कार्यावळीचे आयोजक पयशे घेवन पळून गेले अशी म्हायती थंय हाजीर आशिल्ल्या कांय जाणांनी दिली.
तणाव निर्माण जाल्ल्यान रोखडोच पुलीस पंगड थंय पावलो. कायदो आनी सुवेवस्था तिगोवन दवरपाक आनी स्थिती हाताळपाक पुलिसांनी लाठीमार केलो. धक्को दिवपी गजाल म्हणल्यार तिडकिल्ल्या लोकांनी लागसारच्या शाळेचेर गरज नासतना गुंडे मारले. वेवस्थापन आनी सुरक्षा मळार व्हडली चूक जाल्ल्यान ही घडणूक घडली हें स्पश्ट जाता आनी आयोजकांचेर बेगोबेग कारवाय करपाची मागणी थळाव्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
