भांगरभूंय | प्रतिनिधी
5 पॉवर ट्रिलर, चार चिरें काडपाचीं यंत्रां मेळून लाखांचो म्हाल जप्त
भांगरभूंय । प्रतिनिधी
केपें: पिर्ला- केप्यां बेकायदो तरेन चालू आशिल्ल्या चिऱ्या खणीचेर धाड घालून लाखांनी रुपयांचीं यंत्रां जप्त केलीं. तातूंत 5 पॉवर ट्रिलर आनी चार चिऱें काडपाच्या यंत्रांचो आस्पाव आसा. खण खातें, केपें मामलेदार, केपें पुलीस हांच्यो जोडपालवान ही कारवाय केली.
पिर्ला नव्या पंचायत घरा लागसारच्या रस्त्या कुशीक ही खण फाटल्या कितल्याश्याच म्हयन्यांच्यान चलताली. मुख्य रस्त्या कुशीक 5 हजार चौखण मिटर जमनीर 4 अत्याधुनीक यंत्रां लावन चिरे काडटाले. हे विशीं खण खात्या कडेन कागाळ केल्ली. ते प्रमाण बुधवारा ही कारवाय केली, अशें खण खात्याचे अधिकारी जयवंत कामत हांणी सांगलें.
फाटल्या दोन वर्सांत सुमारा भायर चिरे काडल्यात. खण खात्याची परवानगी घेनासतना चालू आशिल्ल्या ह्या बेकायदो वेवसायाक लागून सरकाराक व्हड प्रमाणाचेर महसुलाचें लुकसाण जालां. विशेश म्हणल्यार पिर्ला मुख्य रस्त्या कुशीक ही बेकायदो खण चलताली. खम खात्याच्या अधिकाऱ्यांनी बुधवारा सकाळीं पुलीस संरक्षणांत खणीचेर धाड घातली. हे कारवायेची कल्पना नाशिल्ल्यान सदां वरीं 9 यंत्रां रावन चिरे काडपाचें काम चालू आशिल्लें. अधिकारी येता तें पळोवन बिगर गोंयकार कामगार सगळीं यंत्रां थंयच सोडून रानांत पळून गेले. केपेंचे संयुक्त मामलेदार साळगांवकार हांणी तलाठ्या वांगडा घडणुकेचे सुवातेर भेट दिवन परिस्थितीचो नियाळ घेतलो. केपें पुलीस स्टेशनाचे पुलीस उपनिरिक्षक गौतम शेटकार हांणी पंचनामो केले उपरांत मामलेदार साळगांवकार हांणी तांकां सगळीं यंत्रां जप्त करून ताब्यांत घेवपाची सुचोवणी केली. यंत्राचे बाबतींत भौशीक बांदकाम खात्याक पत्र बरयतले, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
