भांगरभूंय | प्रतिनिधी
अनवळख्यां आड गुन्यांव नोंद; वाटमारींतल्यान प्रकार घडिल्ल्याचो अदमास
म्हापशें: पिर्ण- बार्देस हांगासरल्या सड्यार मरण आयिल्ले अवस्थेंत सांपडिल्ल्या तरणाट्याचो खून जाल्ल्याचें उक्तडार आयलां. कपील चौधरी (19, रा. उत्तर प्रदेश) अशें मयताचें नांव आसा. ह्या प्रकरणांत कोलवाळ पुलिसांनी अनवळख्यां आड खुनाचो गुन्यांव नोंद केला. हो प्रकार वाटमारींतल्यान घडिल्लो आसुये असो दुबाव उक्तावन पुलिसांनी तपास सुरू केला.
मेळिल्ले म्हायती प्रमाण शुक्रारा 31 वेर सकाळीं 8.30 वरांच्या सुमाराक ही घडणूक उक्ताडार आयली. पिर्ण सावन थिये वचपी मार्गार केळ पिर्ण आनी खरगाळी कान्सा, थिये शिमेर सडो वाठारांत रस्त्याचे कुशीक एक तरणाटो पडिल्लो. ह्या रस्त्या वेल्यान यो-वच करपी लोकांचे नदरेक हो प्रकार आयलो. तांणी 108 अॅम्बुलन्सीक आपयलें.
अॅम्बुलन्सींतल्यान मयताची कूड म्हापशेंच्या जिल्हो हॉस्पिटलांत हाडली. थंय दोतोरांनी मयताक मरण आयिल्ल्याचें जाहीर केलें आनी घडणुकेची म्हायती कोलवाळ पुलिसांक दिली.
मयताचे कुडीचेर मारपेट जाल्ल्याच्यो गंभीर जखमो आशिल्ल्यो. ताका लागून ह्याच कारणाक लागून ताका मरण आयलां आसुये असो मुळावो अदमास दोतोरांनी उक्तायलो.
मयत तरणाटो हो बिरेस्तारा रातीं कान्सा थिये सोऱ्याचे घुंवळेंत पिर्णा वटेन वतना खूबशा जाणांचे नदरेक पडिल्लो. वाटेर ताणें जायत्या जाणां कडेन लिफ्ट लेगीत मागिल्ली. चलत वतना अनवळखी वाहन चालकां कडेन ताची लटाफट जाल्ली आसुये आनी लुटीच्या उद्देशान ताका मारपेट केल्ली आसुये असो दुबाव पुलिसांनी उक्तायला.
घडणूक थळार पुलिसांक एक वळखपत्र सांपडिल्लें. ताचेर दीपक ठाकूर अशें नांव आशिल्लें. ताका लागून मयताचो चेरो हो ईशान्य भारत आनी नेपाळांतल्या लोकां प्रमाण दिसतालो आनी तो त्याच वाठारांतलो आसुये असो अदमास करून पुलीस मयताची वळख पटोवपाचो यत्न करताले. चवकशे वेळार मयताचें नांव कपील चौधरी आसून तो उत्तर प्रदेशांतलो आशिल्ल्याचें उक्तें जालें.
पुलिसांनी उपरांत मयताच्या सोयऱ्यांचो आनी पालकांचो सोद घेतलो. रातीं उसरां मयताच्या बापायन पुलिशेंत रितसर कागाळ नोंद केली. ते प्रमाण पुलिसांनी अनवळख्यां आड खुनाचो गुन्यांव नोंद केला.
मजगतीं, रातीं उसरां मेरेन पुलीस अधिक्षक राहूल गुप्ता आनी उपअधिक्षक विल्सन डिसोझा हे कोलवाळ पुलीस स्टेशनार आशिल्ले. फुडलो तपास पुलीस निरिक्षक निखील पालेकार हे वरिश्ठांच्या मार्गदर्शना खाला करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
