भांगरभूंय | प्रतिनिधी
भांगरभूंय । प्रतिनिधी
म्हापशेंः चांदईवाडो- पिर्ण हांगा शापोरा न्हंयेंत बेकायदेशीरपणान रेंव काडपी दोग कामगारांक कोळवाळ पुलिसांनी अटक करून होडें आनी तातूंतली साडेआठ घनमीटर रेंव जप्त केली. मूळ उत्तर प्रदेशांतल्या रामगोविंद सहानी (50) आनी अजय दीनानाथ सहानी (42) अशी अटक केल्ल्या कामगारांचीं नांवां आसात. जप्त केल्लें होंडें फुडले कारवाये खातीर कॅप्टन ऑफ पोर्टाचे सुवादीन केल्या. जाल्यार रेंव परत न्हंयच्या उदकांक उडयली.
बार्देश मामलेदार कार्यालय, खण खातें, कॅप्टन ऑफ पोर्टे आनी कोलवाळ पुलिसांनी मंगळाराक फांतोडेर ही जोड कारवाय केली. मामलेदार दशरथ गांवस, खण खात्याचो पालवी जिओलॉजिस्ट शाम सावंत, कॅप्टन ऑफ पोर्ट खात्याचे अधिकारी आनी पुलीस उपनिरीक्षक मंदार परब ह्या वेळार हाजीर आशिल्ले. ह्या पंगडान शिवोले तें पिर्ण मजगतीं शापोरा न्हंयेचे देगेर रेंव काडटात त्या वाठाराची पळोवणी केली. फांतोडेर 5च्या सुमाराक चांदई पिर्ण हांका न्हंयच्या पात्रांत वोटचे मजतीन रेंव काडपाचें काम चलिल्लें तांका दिसलें. तांणी छापो घालून दोन कामगारांक धरून होंडें जप्त केलें.
होंड्यांत न्हंयेतल्यान काडिल्ली सुमार 11 हजार रुपया मोलाची आडेआठ घनमीटर रेंव आशिल्ली. जिओलॉजिस्ट शाम गांवकार हांणे केल्ले कागाळे वयल्यान कोलवाळ पुलिसांनी गुन्यांव नोंद करून कामगारांक अटक केली. तांका म्हापशेंच्या पयलो वर्ग न्यायालयांत उबें केलें तेन्ना ताकां तीन दिसांची पुलीस कादयेंत दवोरपाचो आदेश न्यायाधिशायन दिलो.
जप्त केल्ल्या होंड्याच्या धनयाची म्हायती कोलवाळ पुलिसांनी कॅप्टन ऑफ पोर्टा कडेन मागल्या. ती मेळटगीर ताका अटक करतले अशें म्हायती कोलवाळ पुलीस स्टेशनांतल्यान दिली. मजगतीं, जोड मोहिमे खाला शापोरा न्हंय पट्ट्याची पळोवणी करून बेकायदेशीरपणान रेंव काडटल्यांचेर कारवाय करपाचें काम चालू उरतलें अशें मामलेदार दशरथ गांवस हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
