भांगरभूंय | प्रतिनिधी
पयरूच ताणें म्हणलें, आमी इल्ले सकारात्मक जावया. वायटांतूय बरें सोदुया. कबिरानूय म्हणलां न्ही, एकल्यान
सांगलें आनी दुसऱ्यान आयकलें तर एकलो खंय ज्ञानी आनी दुसरो शाणो. (एकने कहा, दुसरेने माना, कहत कबीर एक है ग्यानी दुसरा सियाना) म्हणून हांवेंय चिंतलें आयकुया ताचें आनी जावया सकारात्मक वा शाणे. कोणाचेंय बरें आयकूंक कितें जालां? तर सकाळीं पावसाची एक दडक आयली आनी लायट गेली. लायट आनी पावसाची केन्नाच युती जावची ना काय? म्हाका सदांच हो प्रस्न पडटा. काँग्रेसीचे आमदार जर भाजपा कडेन जुळोवन घेवंक शकता जाल्यार पावसाक लायटी कडेन युती करूंक कितें जालां काय? पावसाची मात्शी दडक आयली रे आयली लायटीन तोंड लिपोवंकूच जाय?
सकाळीं साडे आठांक गेल्ली लायट आतां साडे इकरांक आयली. मदीं चार फावटी आयली पूण स्थीर रावली ना. आतां तरी उरल्यार पुरो. सकारात्मक जातलों म्हणून कितलेंय थारायलें तरी जमच ना. ही लायट जावंक दिना. मात्सो पावस पडलो रे पडलो वा मात्शें वारें मारलें तर लायट वचप हें सदचेंच जालां. आतां दिसाक चार फावटी तरी लायट गेली ना तर हांव खंय रावलां काय म्हणपाचो म्हाकाच दुबाव पडटा. बाबडे लायनमेन पावसांत भिजून वा वतांत करपून म्हणटात तशे काम करतात. रात दीस कितेंय आसूं सोदतात बाबडे फॉल्ट. आनी इतलेंय आसून लोकांच्यो गाळी आसाच. काम करतल्यांकूच खेपप ही आमची सवंय. काम करिनाशिल्ल्यांक कोण कांय म्हणिना. काम करतलोच लोकांचे तावडींत सांपडटा. फाटलीं वीस पंचवीस वर्सां खुर्च्यो तापोवन गेल्ल्यांक कोणे विचारलेंच ना. आतां काम करतल्यांक दुशणां दिवपाचीं. खंयचीय गजाल एकाच दिसान पेड्डेर जायना न्ही. वेळच्या वेळार रिपेरींग करीत जाल्यार ती गजाल सारकी उरता. पूण थंय लक्षूच दिलें ना आनी फक्त खुर्चेचो उपभोग घेतलो म्हणजे कितें जावपाचें? ती गजाल कावलाक येतलीच. आनी ती सारकी करूंक कितलो तेंप वतलो कळप कठीण. आतां एका दिसान पालास बांदूक जाता? पूण हें आमकां कशें कळपाचें? आमची सवंय काम करूंक मुखार सरता ताकाच खेपपाचो.
आतां लायटीचेंच पळेयात. फाटलीं पंचवीस वर्सां कोणे लायटी सरयो, खांबे, ट्रान्सफोर्मर हांचेर लक्षूच दिलें ना. जें कितें केलें तें तात्पुरतें. परिणाम आयज आमी भोगतात तो. मात्सो पावस शेनलो वा वारें मारलें, लायट गेली. बाबडे वीज खात्याचे कर्मचारी रात वा दीस पळेनासतना वणवण भोंवत फोल्ट सोदतात. आनी जे हाचे खातीर जापसालदार आसात ते मात घरांत वोग्गी बसून मजा पळेतात. सद्याक तरी लायट वचपाक आमीच जापसालदार म्हणचें पडटलें. आतां आमी कशे हो प्रस्न कोणाकूय पडूं येता. कशे तें पळेयात. आमी खंयूय घरा खातीर प्लॉट घेतात. तिनशें मिटराचो प्लॉट. पयलीं वरी एकरांनी जमीन घेवप कशें परवडटलें. आतां तिनशें मिटराचो पुरेपूर उपयोग करपाचो. बांदू येता तितलें घर बांदपाचें आनी कंपावंडाक तेंकून झाडां लावपाचीं. झाडां कापून प्लॉट करपाचे आनी उपरांत त्याच जाग्यार झाडां लावपाचीं. आतां तिनशें मिटरांत घर बांदतकूच झाडां लावंक आनी जागो खंय उरतलो? तरी आमी माड, पणस, आंबे, चिकू हीं झाडां लायतलेच. आतां ह्या झाडांक वत जाय म्हणटकूच झाडां रस्त्या वटेन वा शेजारच्या प्लॉटांत बागवतलीं. आमी माड वा हेर झाडां लायतात पूण तांची कुयदाद घेतात व्हय? आज पयलींच पाडेली मेळप कठीण. मागीर ह्या चार आनी पांच माडांक कोण विचारतलो? परिणाम चुडटां सुकून पडपाचीं, नाल्ल पडपाचे. लागच्यान लायटीच्यो सरयो आसताच. त्यो पोरण्यो जाल्ले कारणान रोखड्योच तुट्टात. सरयो तुटल्यो म्हणजे लायट
वतलीच न्ही!
सरी खंय तुटल्या हें सोदतासर लायनमेनाक नाका जावपाचें. बाबा आपणें माड लायल्यात जाल्यार ताचे पासून कोणाक त्रास जावचे नात हें पळोवंक नाका? हे लोक नाल्ल पडल्यार काडूंक येतात पूण चुडटां? मात्शे रस्त्यान भोंवून पळेयात. रस्त्याच्या कडांनी कुसत पडिल्लीं चुडटां दिसतलीं. वीज खातें दरवर्सा पावसा पयलीं झाडांच्यो खांदयो कापता. पूण कांय लोक ताकाय आडमेळीं हाडटात. ते झाडांच्यो खांदयो कापतात पूण माडाचीं चुडटां कोण कापतलो? खरें म्हणल्यार कंपावंडाक तेंकून व्हडलीं झाडां लावपाचेर बंदीच येवंक जाय. झाड वा खांदी कंपावंडा भायर बावगली तर ती रोखडीच कापूंक लावंक जाय. कोणाच्याय झाडाक लागून वा चुडटाक लागून लायटीचें लुकसाण जालें तर त्या मनशाक जबर दंड घालूंक जाय. आतां कोणाच्याय भाटांतल्यान वा कुळागरांतल्यान विजेच्यो सरयो गेल्या आसत तर एकवेळ समजूं येता. पूण एन. ए. केल्ल्या ल्हान-ल्हान प्लॉटांनी जेन्ना कोणूय व्हडलीं झाडां, माड बी रोयतात तांणी झाडांची जापसालदारकी घेवंक शिकूंक जाय. नासल्यार जाता कितें तर हांकां लागून दुसऱ्याचें लुकसाण जाता. शेजाऱ्याक ताचे त्रास जातात. कोणाचे गाडयेचेर नाल्ल पडटा तर कोणाच्या घरार माड पडटा. झाडांचो पालो तर दुसऱ्याच्याच जाग्यार पडूंक जाय असो नेम आसुये. निवळ आनी कोण करतलो? जाका त्रास जातात ताणें करपाचें. लायटीक तर सदांच त्रास. लायनमेनांनी तरी कितलें नाचपाचें? रात रात गांव काळखांत उरता. हाचेर तोड काडप गरजेचें. एक तर असलीं झाडां मुळासकट कापपाचीं नासल्यार रोयतल्यांनी सारकी बरी कुयदाद घेवपाची. हाची जोवेर सक्ती जावची ना तोवेर हें अशेंच चलपाचें. सद्याक हांव सकारात्मक, नाल्ल नासूं चुडटां तरी म्हज्या वांट्याक येतात.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
