भांगरभूंय | प्रतिनिधी
सगळें भोपाळ पळोवंक आमचे कडेन तसो चड वेळ नाशिल्लो. एक आख्खो दीस आमी साची, भीमबेठका आनी भोजपुरा पासत दवरिल्लो. हॉटेलांतल्या लोकांनी आमका सांगलें, ‘‘बाकी कितेंय सोडात पूण पिपल्स वर्ल्ड-सात अजापां मात पळयातच.”
खरें म्हळ्यार हें ‘पिपल्स वर्ल्ड पळोवंक आख्खो दीस जाय. तरी आमी थंय धांवती भेट दिवपाची थारायली. हाॅटेलाचे गाडयेन आमी पिपल्स वर्ल्डा कडेन आयलीं.
खूब व्हड वांठारांत हें आसा. तिकेटी काडून आमी भितर सरलीं. दारांतल्यानच अजापांक सुरवात जाली. भितर वचपाची वाट रंगरंगयाळ्या चित्रांनी नटयल्ली. तातूंत जनावरां, सुकणीं, झाडां, वाली, फुलां सगळ्यांचीं चित्रां काडिल्लीं. ल्हान भुरग्यांक सामकीं आवडपाचीं कशीं.
सुरवेक दोनूय कुशींनी व्हड व्हड सालां आसात. तातूंत भुरग्यांच्या मनरिजवणेचे तरेकवार खेळ आसात. थंय भुरग्यांची गर्दी आसली. खेळ म्हणून कसले, गाडयो चलोवप, स्कुटरी चलोवप अशे तरेकवार खेळ. मुखार भूत घर. हांगां भुरग्यांचे खेळ पळोवंक आमी भितर गेलीं नात. पूण हांव हैदराबाद गेल्लें तेन्ना रामोजी फिल्मसिटींत भुरग्यांचे हे खेळ पळयल्ले. भुतांचें घर सामकें भयानक. आमी सुद्धां भिल्लीं. भुरगीं तर किळांच्यो मारतालीं. कांचघर मात पळोवपा सारकें. हांवें जयंतीक म्हळें “हें मजेशीर आसा, मात्शीं भितर वचून येवया”
हांगां तरेतरेचे हारशे आसात. आमी सामकीं विचित्र कशीं तातूंत दिसतालीं. बारीक, मोठीं, वांकड्या तोंडाचीं, वांकड्या दांतांचीं, दांत वयर आशिल्लीं. अशीं थोडीशीं चित्रां हारशांत पळोवन आमकां, खूब हांसूंक आयलें. अश्योच बाकीच्यो कितें कितें तरेकवार गजाली थंय आशिल्ल्यो. आमी चड भितर गेल्लीं जाल्यार त्या भूल- भुलैयांतल्यान आमकां भायर येवंक खुबूच वेळ लागतलो आसलो.
थंयच्यान आमी मुखार सरलीं. थंय परत तिकेट काडून सात अजापां पळोवपाक भितर गेलीं. भितर भारतांतल्योच न्हय तर जगांतल्या अजापांच्यो प्रतिकृती करून दवरिल्ल्यो. मदी-मदीं सुंदर बागो. त्यो त्या त्या देशांतल्या बागांवरी. देखीक, हैदराबाद, बंगळुरू, काश्मीर हांगाच्यो तरेकवार बागो आनी त्या बागां मदीं त्या राज्यांतली, देशांतलीं अजापां.
खूब व्हड आंवाठांत हें अजापांचें जग वसयलां. हें सगळें भोंवून पळोवंक खूब वेळ तर लागताच, पांय लेगीत दुखून वचपाचे. हे खातीर थंय बॅटरीवयल्यो गाडयो दवरल्यात.
मदीं मदीं व्हड व्हड जनावरांय करून दवरल्यांत. वाग, शींव, डायनासोर हांकां पळोवन भुरगीं भियेतालीं. ते भायर मदी-मदीं तोफो आनी राणगाडेय दवरल्यात. खरे सॅक्युरिटी गार्ड वचत थंय आशिल्लेच. ते भायर हातांत आर्मां आशिल्ले शिमिटाचे सॅक्युरिटी गार्ड करून दवरिल्ले. थंय ताजमहाल, लोटस टेंपल, लाल किल्लो, इंडिया गेट, चौपाटी, ताज होटेल हांच्यो व्हड व्हड प्रतिकृती करून दवरिल्ल्यो. ते भायर जगांतलीय अजापां करून दवरिल्लीं. तातूंत स्वातंत्र्य ज्योत, आयफेल टॉव्हर, स्मार्ट सिटी अशीं जायतीं अजापां थंय दवरिल्लीं. वॉटर पार्क, अम्युजमेंट पार्कय तयार केलां. थंय भुरग्यांची गर्दी आशिल्ली. भुरग्यांक तश्यो जाण्ट्यांक आवडपाच्यो ह्यो सगळ्यो गजाली इतल्यार सोंपल्यो नात. खरे हत्ती, घोडे आनी ऊंट सुद्धां आशिल्ले. तांचेर बसुनय भोंवंडी मारून येवंक मेळटाली. ह्या सगळ्याक आमी धांवती भेट दिली. कांय गजाली अमी पयसुल्ल्यानूच पळयल्यो आनी भायर सरलीं. ( फुडें चलता)
माया खरंगटे
94206 85278
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
