भांगरभूंय | प्रतिनिधी
आनीक तीन चलयांच्यो जबानी घेवपाक पुलिसांचो यत्न
कुडचडें लैंगीक शोशण प्रकरण
पणजी: कुडचडें लैंगीक शोशण प्रकरणाची व्याप्ती दिसानदीस वाडतूच आसा. ह्या प्रकरणांत आनीक तीन चलयांच्यो जबान्यो नोंद करपा खातीर तपास अधिकारी यत्न करीत आसात. कागाळ करपी पिडितांची संख्या आतां पांच जाल्या. दुबावीत सोहम नायक हाचे आड आतां मेरेन चार एफआयआर नोंद केल्यात. दुबाविताक न्यायालयान आनीक चार दिसांची पुलीस कोठी दिले उपरांत, गुन्यांव फांटो ह्या प्रकरणाचो खोलायेन तपास करतात.
पुरावे एकठांय करपा खातीर यत्न
गुन्यांव फांट्याचे दोन स्वतंत्र पुलीस निरिक्षक ह्या प्रकरणाचो तपास करतात. पिडितांच्यो जबान्यो नोंद करून घेत आसात. दुबावितान आनीक कांय चलयांक आपल्या जाळांत ओडल्यात बी काय कितें हाचो सोद पुलीस घेतात. चड करून इलेक्ट्रॅनीक पुरावे एकठांय करपाचेर तपास अधिकाऱ्यांचो भर आसा.
आनीक कांय जाणांक अटकपुलीस म्हासंचालक आलोक कुमार हांणी पत्रकारां कडेन उलयतना सांगलें की, ह्या प्रकरणाचो निश्पक्ष तपास सुरू आसा. तपासांत जशी म्हायती मुखार येतली ताचे वेल्यान आनीक कांय जाणांक अटक जावपाची शक्यताय न्हयकारूं येना. प्रकरणाची संवेदनशीलताय लक्षांत घेवनूच तपास गुन्यांव फांट्या कडेन सोंपयला. जेणेकरून खेालायेन चलकशी जातली, आनी पिडितांची वळखूय गुप्त उरतली.
जावपाची शक्यतायः डीजीपी
प्रकरण अशें आयलें उक्तडार
दुबावीत सोहम नायक हाणें कांय चलयांचें लैंगीक शोशण करून अश्लील व्हिडियो तयार केल्ल्याची म्हायती स्वताच्या इश्टांक दिली आनी थंय सावनूच हें प्रकरण उक्तडार आयलें. उपरांत कुडचडेंचे थळावे ग्रामस्थ आनी नगरसेवकांनी आक्रमक भुमिका घेवन आंदोलनाची शिटकावणी दिल्ली. लोकांची तिडक वाडटकूच कुडचडें पुलिसांनी गुन्यांव नोंद करून सोहमाक अटक केली. उपरांत मंगळारा हें प्रकरण फुडल्या तपासा खातीर गुन्यांव फांट्या कडेन वर्ग केलें.
इश्टागतीचें निमीत करून शोशण
चलयां कडेन इश्टागत करून लागसारपण सादप, वेगळीं वेगळीं निमतां करून तांचें लैंगीक शोशण करप आनी उपरांत व्हिडियो शूट करप, ही सोहम नायकाची कार्यपद्दत आशिल्ल्याचें एका वरिश्ठ पुलीस अधिकाऱ्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
