भांगरभूंय | प्रतिनिधी
कादये सयत 50 हजार रुपया मेरेन जातलो दंड
भांगरभूंय । प्रतिनिधी
पणजी : पिटबूल, रॉटवायलर वा हिंस्र जातीचें सुणें वा हेर प्राणी बाळगुपाचेर आतां निर्बंध येतले. हिंस्र सुण्याची नोंदणी करपा सयत तांचें निर्बीजीकरण करप सक्तीचें आसा. नोंदणी वा निर्बीजीकरण केलें ना, जाल्यार 15 दीस ते 3 म्हयन्यां मेरेन कादय आनी 50 हजार रुपया मेरेन दंड जातलो.
पावसाळी अधिवेशनांत गोंय प्राणी प्रजनन, नियंत्रण आनी लुकसाण भरपाय विधेयक संमत जाल्लें. ह्या विधेयकाक राज्यपालांनी मान्यताय दिल्ल्यान आतां ताचें कायद्यांत रूपांतर जालां. कायद्याची अधिसुचोवणी जारी जाल्या.
गोंयांत पिटबूल, रॉटवायलर सारक्या सुण्यां कडल्यान खूब जाणांचेर हल्ले जाल्यात. ह्या हल्ल्यांत ल्हान भुरग्यांक मरण लेगीत आयलां. हाका लागून पिटबूल, रॉटवायलर सारक्. सुण्यांचेर बंदी घालपाची मागणी जाताली. ह्या सुण्यांचेर बंदी घालपा खातीर सरकारान हो नवो कायदो केला. ह्या कायद्या प्रमाण नव्यान पिटबूल, रॉटवायलर वा हेर हिंस्र जातीचीं सुणीं हे फुडें हाडपाक मेळचीं ना. हिंस्र जातींच्या सुण्यांची वळेरी आशिल्ली अधिसुचोवणी जारी जातली. ही अधिसुचोवणी अजून जारी जावंक ना. जांचे कडेन पिटबूल, रॉटवायलर वा हेर हिंस्र सुणीं आसात, तांणी 30 दिसां भितर ताची खात्या कडेन नोंदणी करची पडटली. नोंदणी केल्या उपरांत 60 दिसां भितर सुण्याचें निर्बीजीकरण (नसबंदी) करपाक जाय. नोंदणी वा नसबंदी केलीना जाल्यार कादये सयत 50 हजारांचो दंड जातलो. तशेंच सुण्यांच्या हल्ल्यांत जर कोण जखमी जालो वा मरण आयलें जाल्यार ताका वा ताच्या कुटुंबीयाक धनया आड लुकसाण भरपाये खातीर खटलो घालपाक मेळटलो. हल्ल्या उपरांत 6 म्हयन्यां भितर हो खटलो घालचो पडटलो. संबंदीत यंत्रणेक खटल्याचेर 3 म्हयन्यां भितर निर्णय दिवचो पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
