भांगरभूंय | प्रतिनिधी
मोबायल गेमीच्या वेसनान केलो घात
कोलकत्ता, खबरां संस्था ः ऑनलायन मोबायल गेमीचो पासवर्ड शेअर करपाक न्हयकार दिल्ल्यान धावेच्या विद्यार्थ्याचो ताच्याच वर्गांतल्या चार विद्यार्थ्यांनी खून करून ताची कुड कानालांत उडयली. 8 जानेवारीक विद्यार्थी बेपत्ता जाल्ल्याची कागाळ दाखल जाले उपरांत पुलिसांनी तपास केलो, तेन्ना ही घडणूक उजवाडाक आयली. अस्तंत बंगालांतल्या मुर्शिदाबाद जिल्ह्यांतलो हो प्रकार.
बेपत्ता आशिल्ल्या पापाई दासाची कूड फरक्काच्या फीडर कानालांत निशिंद्र घाटा लागसार मेळ्ळी. मजगतीं, चवकशीं केले उपरांत मोबायल फोना वयले ऑनलायन गेमीचो पासवर्ड शेअर करपा विशीं मतभेद जाल्ल्यान ताच्याच चार लागींच्या इश्टांनी पापाई ह्या विद्यार्थ्याचो खून केल्ल्याचें पुलिसांनी कळ्ळें. ह्या प्रकरणांत दुबावीत भुरग्यांक अटक केल्या.
पापाई आनी ताचे इश्ट फरक्का गॅरेजी लागसार ऑनलायन गेम खेळटाले. पापाई घरा भायर सरलो. मात तो परत आयलोच ना. 9 जानेवारीक कुटुंबान पुलिशेंत कागाळ केल्ली. उपरांत ताची कूड मेळ्ळी. पापाईन इश्टां कडेन ऑनलायन मोबायल गेम खेळपा खातीर पासवर्ड शेअर करपाक न्हयकार दिल्लो. ताका लागून तांचे मदीं झगडीं जालीं आनी मागीर खून. खून जाले उपरांत चारुय इश्टांनी पुरावो ना करपाक, स्कुटरींतल्यान पेट्रोल काडून कुड लासपाचो यत्न केलो अशें पुलिसांनी सांगलें.
खून जाले उपरांत आरोपींनी अर्दकुटी जळिल्ली कूड फरक्का फीडराच्या निशिंद्र घाटाक उडयली आनी ते घरा पळून गेले. पापाईची कूड ताच्या मोबायल फोनाच्या टॉवर लोकेशनांतल्यान पुलिसांनी सोदून काडली. पिडिताच्या आवयन ताच्या आंगाचेर आशिल्ल्या टॅटू वयल्यान ताची वळख पटयली. पापाईक ऑनलायन गेमीचे इतलें व्यसन आशिल्लें की ताणें अंदूंची बोर्डाची परिक्षा लेगीत दिवंक ना अशें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
