भांगरभूंय | प्रतिनिधी
हैदराबाद, खबरां संस्था: तेलंगण पुलिसांक तांच्या स्वदेशी डिजिटल प्लॅटफॉर्म व्हेरीफास्ट (VeriFast) क लागून पासपोर्ट पडताळणी खातीर देशांत पयली सुवात मेळयल्या. ह्या अॅपाक लागून प्रक्रियेची गती, अचुकताय आनी पारदर्शकताय मात्शी वाडिल्ल्यान राज्याक राष्ट्रीय पांवड्यार मान्यताय मेळ्ळ्या.
राज्य पुलिसां कडल्यान पासपोर्ट पडताळणी तीन दिसां भितर पुराय करता, जी राष्ट्रीय सरासरी परस खूब मुखार आसा. सदांच २,००० परस अदीक पडताळण्या प्रक्रियेंतल्यान गेल्ल्यान, वर्सुकी प्रमाण ८ लाखां परस चड आसा. तरी चडश्या पुलीस स्टेशनांनी शुन्य बॅकलॉग राखपाक तेलंगणा येसस्वी थारलां.
व्हेरीफास्ट अॅपाक लागून प्रकरणांचे डायनॅमीक री-असायनमेंट शक्य जाता, हाका लागून अधिकारी रजेचेर आसूनय वा कामाच्या वज्याक लागून उशीर जावपाची श्कयताय उणी जाता. एसएमएस वरवीं एकठांय केल्ल्या अभिप्राया प्रमाण, ९५ टक्क्यां परस चड अर्जदारांनी हे प्रक्रिये विशीं समाधान उक्तायलां. ह्या अॅपा वरवीं राज्याच्या गुप्तचर यंत्रणे कडेन समन्वय सादून फटींगपणाकूय आळ घालतात.
दरेके पडताळणींत फील्ड व्हेरिफिकेशन अधिकारी (FVOs), निरीक्षक, एसीपी आनी पासपोर्ट पडताळणी कुडीचो आसपाव आशिल्ली भोव-स्तरीय चाचणी प्रक्रिया आसता, जी अचूकताय आनी जापसालदारकी सुनिश्चीत करता.
व्हेरीफास्ट अॅप सध्याच्या उपकरणांचेर चलता आनी Android, iOS, Windows, Linux अश्या सगल्या मुखेल प्लॅटफॉर्मांक सपोर्ट करता. हाका लागून पुलीस विभागाचो खर्चूय व्हडा प्रमाणांत वाटवता. बेगीनूच अर्जदारांक घर भेटी खातीर वेळ निवडपाचो पर्याय उपलब्ध जातलो, ही प्रक्रिया नागरिकां खातीर आनीक सुलभ आनी अनुकूल जातलें.
तेलंगणचे गुप्तचर महासंचालक बी. शिवधार रेड्डी हांकां आयज २४ जुनाक दिल्लीक परराष्ट्र वेव्हार मंत्रालया वतीन ‘पासपोर्ट सेवा दीस’ म्हणून ‘Certificate of Excellence’ दिवन सन्मानीत करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
