भांगरभूंय | प्रतिनिधी
नवी दिल्ली, खबरां संस्था ः सिंगापूरचो पासपोर्ट हो संवसारांतलो सगळ्यांत बळिश्ट पासपोर्ट. हेन्ली अँड पार्टनर्स ह्या पासपोर्ट रँकिंग संस्थेन संवसारांतल्या सगळ्यांत बळिश्ट पासपोर्टांची क्रमवारी जाहीर केल्या. हे वळेरेंत भारताचो 82वो क्रमांक आसा.
अंदूं जानेवारींत जाहीर केल्ल्या निर्देशांकाचे तुळेंत भारताची क्रमवारी 3 सुवातींनी वाडल्या. भारतीय पासपोर्टांत 58 देशांत व्हिसा फ्री प्रवेश आसा. ताचे आदीं जानेवारींत जाहीर केल्ल्या निर्देशांकांत भारताची क्रमवारी 5 सुवातींनी उणी जाल्ली. 2023 वर्सा भारताचो क्रमांक 80वो आशिल्लो.
हें वळेरेंत सिंगापूरचो पासपोर्ट पयल्या क्रमांकाचेर आसा आनी 195 देशांनी व्हिसा मुक्त वैधताय आसा. जपाना सयत फ्रांस, इटली, जर्मनी आनी स्पेन हांचो दुसरो क्रमांक आसा आनी तांच्या पासपोर्टांचेर 192 देशांनी व्हिसा मुक्त प्रवास करपाक मेळटा. ऑस्ट्रिया, फिनलंड, आयर्लंड, लक्समबर्ग, नेदरलँड, दक्षीण कोरिया आनी स्वीडन तिसऱ्या क्रमांकाचेर आसात आनी तें 191 देशांनी फुकट व्हिसा प्रवेश दिता.
भारताचो शेजारी देश पाकिस्तानाचो पासपोर्ट संवसारांतलो चवथ्या क्रमांकाचो दुबळो पासपोर्ट जावन आसा. पाकिस्तान पासपोर्ट 100 क्रमांकाचेर आसा. तांच्या नागरिकांक व्हिसा मुक्त 34 देशांनी प्रवेश करुंक मेळटा. सुमार दोन वर्सां सावन झूज सुरू आसून लेगीत युक्रेनाचो पासपोर्ट भारताच्या न्हय, तर रशियाच्या पासपोर्टा परसूय चड बळिश्ट आसा.
हेन्ली अँड पार्टनर्सच्या वळेरेंत युक्रेनचो पासपोर्ट 30 व्या क्रमांकाचेर आसा. हांगचे नागरीक 148 देशांनी फुकट व्हिसा प्रवास करपाक शकतात. जाल्यार रशियन पासपोर्टचो क्रमांक 45 आसा. रशियन नागरीक व्हिसा बगर 116 देशांक भेट दिवपाक शकतात. 10 म्हयन्यां सावन हमास कडेन झूज करपी इस्रायलच्या पासपोर्ट 18व्या क्रमांकाचेर आसा. अफगाणिस्तानाचो पासपोर्ट संवसारांतलो दुबळो पासपोर्ट जावन आसा. अफगाणिस्तानाचो पासपोर्ट क्रमांक 103 चेर आसा. ह्या पासपोर्टाचेर फकत 26 देशांनी व्हिसा मुक्त प्रवास करूं येता.
आंतरराष्ट्रीय हवाई येरादारी संघटनेचे आंकडेवारीचेर आदारून ही क्रमवारी जाहीर केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
