भांगरभूंय | प्रतिनिधी
नवी दिल्ली, खबरां संस्था ः पासपोर्ट मेळोवपाची प्रक्रिया सुदारपा खातीर सरकार सतत यत्न करीत आसा. पासपोर्ट अर्जदारांच्या पुलीस सत्यापनांत लागपी वेळ उणो करपा खातीर परराश्ट्र मंत्रालय वावुरता अशें केंद्रीय परराश्ट्र मंत्री एस जयशंकर हांणी सांगलें. हे खातीर एमईए राज्यां आनी केंद्रशासीत प्रदेशांच्या पुलीसां कडेन समन्वय सादपाचो यत्न करता.
पासपोर्ट सेवा दिसा निमतान जयशंकर हांणी सांगलें, आंतरराष्ट्रीय वेपार आनी गुंतवणूक सुवीधा सोप्यो करुन आनी जागतीक हालचाल वाडोवन पासपोर्टांचो देशाच्या उदरगतीचेर म्हत्वाचो परिणाम जावचो हे खातीर आपलें मंत्रालय कटिबद्ध आसा. पासपोर्टाची बरी सेवा दिवपा खातीर मंत्रालयान 440 पोस्ट ऑफिस पासपोर्ट सेवा केंद्र सुरू केल्यात अशें तांणी सांगलें. हाचे भायर देशभरांत 93 पासपोर्ट सेवा केंद्रां, 533 पासपोर्ट प्रक्रिया केंद्रां आनी 37 प्रादेशिक पासपोर्ट कार्यालयां आसात. तशेंच परदेशांतल्या 187 भारतीय मिशनांनी पासपोर्ट जारी करपाची पद्दत मंत्रालयान एकठांय केल्या.
mPassport पुलीस अॅप 9 हजार पुलीस स्टेशनांनी सुरू
पासपोर्ट वितरण इकोसिस्टमांत आनीक सुदारणा करपा खातीर, पुलीस सत्यापना खातीर लागपी वेळ उणो करपा खातीर मंत्रालय राज्य/केंद्रशासीत पुलीसां वांगडा सतत वावुरता अशें जयशंकर हांणी सांगलें. पुलीस सत्यापन प्रक्रिया सोपी करपा खातीर 25 राज्यांनी आनी केंद्र शासित प्रदेशांतल्या 9000 पुलीस स्टेशनांनी “mPassport Police App” सुरू केला. पेपरलेस दस्तावेजीकरण प्रक्रिया सुलभ करपा खातीर पासपोर्ट सेवा प्रणाली डिजीलॉकर प्रणाली वांगडा येसस्वीपणान एकठांय केल्या.
mPassport पुलिस अॅपा वरवीं सत्यापन वेळ उणो
डिसेंबर 2023 वर्सा लोकसभेत म्हायती दितना जयशंकर हांणी सांगिल्लें की देशभरांत पुलिसांच्या सत्यापनाक सरासरी 14 दीसाचो वेळ लागता. पूण ज्या राज्यांनी आनी केंद्रशासीत प्रदेशांनी mPassport पुलीस अॅप सुरू केला, थंय पुलीस सत्यापन करपाचो सरासरी वेळ पांच दिसां परस उणो लागता. पुलिस सत्यापन वेळ सोडून सामान्य पासपोर्ट दिवपाक सरासरी सात ते धा दीस आनी झटपट पासपोर्टा खातीर सरासरी एक ते तीन दीस लागतात अशें जयशंकर हांणी त्या वेळार सांगिल्लें. पासपोर्ट वेळार धाडपाक अर्जदारांच्या तपशीलांचें पुलीस सत्यापन म्हत्वाची भुमिका करता अशें तांणी सांगिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
