पावित्र्याची विटंबणा

भांगरभूंय | प्रतिनिधी

दरवर्सा इकरा दिसांच्या गणपतीची विसर्जन मिरवणूक कशे तरेन जाता, हें आमी सांगपाक नाका. तन- मन विसरून धुंद जावन तरणाटे नाचतात, इंग्लीश, हिंदी पदांचेर. ह्या वेळार सावंड बाॅक्सां फुटसर डीजे संगीत वाजता. डीजे म्हणल्यार साबार पदां चोरून तीं मिक्स करप, तातूंत शक्य आसल्यार रुची पुरते आपलें इल्लें संगीत घालप आनी थांबयनासतना तें वाजोवप. हाचो आवाज बरोच व्हडलो आसता. भलायकेचेर वायट परिणाम जाता. हिंदू राष्ट्र समन्वय समितीन भौशीक गणपतीचे विसर्जन मिरवणुकींत ‘डीजे’ लावपाक दिवचो न्हय, अशें निवेदन दिलां. माराणूय मारपाक दिवचे न्हय, हीय तांची मागणी. आवाजाचें, हवेचें प्रदुशण, मिरवणुकीचें पावित्र्य, भक्तीभाव ना जावचो न्हय म्हूण तांणी हें पावल उखल्लां. परबीं. मिरवणुकेंत सोरो पियेवन अश्लील पदांचेर नाच करतात, गाडयेकारांक आडयतात, लोकांचेर माराण उडयतात, हें योग्य न्हय, अशेंय तांणी म्हणलां. ताका लागून जायत्या हिंदू भावांच्यो भावना दुखपाक शकतात. पूण कोण कोणाच्या घरा वचून निशेध करीत अशें दिसना. आसूं. मात हे डीजे फक्त भौशीक गणपतीचेच मिरवणुके वेळार वाजनात. घरगुती गणपती पावयतनाय ते वाजल्यात. मिरवणूक चलतना मात चडश्या गांवांनी गजर, भक्तीगीत वाजोवन पवित्रताय राखल्या. हिंदू समितीन हो विशय चिकाटीन हाताळपाक जाय. खूब गरज आसा ताची.
आतां नवरात्रां येतलीं. गुजरातांत पसून जायनात, इतल्या झेतान गोंयांत गरबा, दांडिया जाता. तोय बी गुजराती भेस, पदां बीं लावन. थंयूय डिजे पावला. मुंबय, गुजरातांत तर रातचो अक्षरशा कान फुटसर बोवाळ चलता. मागीर दिवाळेच्या आदले रातीं आमचें गोंय गाजोता. कोणेच केन्ना आयकूंक ना, तसलीं इंग्लीश पदां फांतोड मेरेन शक्य तितल्या व्हडल्या आवाजांत लावपाची सर्तूच चलता. सणांनी फोग कितलो फुट्टा ताचें कोंत, हिशोब आसचो ना. मागीर नाताळ. दर्यादेगो रातदीस थरथरतात. नव्या वर्सा तर आवाजाचो सांवार. शिगम्याक धोल, ताशे आसतना डीजेन थंय पावल दवरलां. सगल्याच धर्मांच्या सणा- परबांक आतां डीजे संगीत, व्हडलीं सावंड बाॅक्सां झळकतात. हिंदू समितीन सगल्याच सणां वेळार जावपी प्रदुशणाची दखल घेवन सरकाराक सुचोवण्यो करपाक जाय. सामान्य नागरिकान आवाज काडल्यार, हिंदू सणा वेळारूच जागे जाता मरे तुमी? हेर धर्मांच्या सणा वेळार प्रदुशण जायना?’ अशें ताका आयकून घेवचें पडटा. थोड्यांक माफी मागची पडल्या, बंदखणूय जाल्या. आतां हिंदू समितीन दिला तो घरचो आहेर, सोनारानूच कान तोंपले प्रकाराचो. निदान विसर्जन मिरवणुके वेळार मंडळांनी प्रदुशण टाळचें.
आवाजाच्या, हवेच्या प्रदुशणाचेर कायदे आसात. मात कोण ते पाळिनात. थोडे सवलतूय मागून घेतात. रातचो 10 ते सकाळीं 6 मेरेन कायद्यान व्हडलो आवाज करपाक मेळना. कांय सणां वेळार सरकार परवानगी दिता. पूण तिचो गैरफायदो घेवप वाडलां. पुलिसांक अधिकार आसात. मात ते आवाज बंद करपाक अपेशी थारल्यात. हाचे फाटल्यान अर्थांत कांय कारणां आसुये. विमानाच्या आवाजाची पातळी 120–140 डीसीबल. फायटर विमानाची देडशें मेरेन. डीजेचो आवाज 90 ते 140 मेरेन आसता. सरभोंवतण थरथरता. 85 डीबी आवाज सतत कानार पडल्यार आयकुपाची तांक उणी जाता, 120 चेर कान सुन्न जातात आनी 140 डीबीचेर कानांचो पड्डो फुटपाक शकता. डीजे कार्यावळींत आतां लेझर लायट घालतात. ताका लागून नदरेचेर परिणाम जाला. हाॅस्पिटलां लागसार आवाज करपाक मेळना. तरीय थंय डिजे, गर्नाल पसून आयकूंक येतात.
विसर्जन मिरवणुकेंत डिजे आनी फोगा आड निवेदन भेटोवपी समितीच्या वांगड्यांनी प्रत्यक्ष घडणूक थळाचेर पुलीस बंदोबस्तांत वच्चें आनी चवथ आनी हेर सगल्याच पवित्र उत्सवांतले गैरप्रकार आडावचे.