भांगरभूंय | प्रतिनिधी
वाहन चालक, लोकांक त्रास; मनपाच्या कामांचेर प्रस्नचिन्न
भांगरभूंय । प्रतिनिधी
पणजीः पाटो पणजे वाठारांतल्या रस्त्यांचेर दर वर्सा प्रमाण उदक सांचून उरपाचो प्रकार परतून सुरू जाला. कांय दिसां आदीं पणजे पडिल्ल्या उटंगराच्या पावसाचें उदक अजून लेगीत सेंट्रल लायब्ररी कडेन वचपी रस्त्याचेर सांचून उरलां. ताचो त्रास वाहनचालक आनी चलून वचपी लोकांक जाता. हे खातीर निरशेवणी उक्तायल्या.
दर वर्सा पावसाळ्यांत पणजेंतल्या हेर वाठारा वरीं पाट्या वयल्या रस्त्यांचेर उदक भरता आनी हुवारा वरी स्थिती निर्माण जाता. पाटो वाठारांत खूबशीं सरकारी कार्यालयां आसात, ताका लागून व्हड प्रमाणांत लोकांचें येवप वचप चालू आसता. ह्या वाठारांत उदक सांचून उरचें न्हय हे खातीर पणजी महानगरपालिका (मनपा) खूबश्यो उपाय येवजण्यो आंखता. पूण फाटल्या कितल्याश्याच वर्सां सावन थंयच्या उदकाचो विलो लावपाक मनपाक येस येना, हे परतून परतून सिद्ध जाता.
सेंट्रल लायब्ररी कडेन वचपी रस्तो उंच- खोलगट आसा. उटंगराचो पावस पडले उपरांत थंय जें उदक सांचता, तें कितलेशेंच दीस थंयच सांचून उरता. ताका लागून ह्या रस्त्या वयल्यान लोकांक वचपाक मेळना. तशेंच गाडयो लेगीत पार्क करपाक मेळनात. फाटल्या कांय वर्सां सावन हो प्रकार असोच चलता, हाका लागून सरकारी कर्मचारी आनी हेर वाहन चालकांनी मनपाच्या कामां विशीं प्रस्नचिन्न उपस्थीत केलां.
मजगतीं, पणजी बसस्टॅण्डा वयल्यान पाटो वटेन वचपी मार्गार लेगीत आठ दिसां आदीं पावसाचें उदक सांचून उरिल्लें. ताका लागून ह्या मार्गा वयल्यान वचपी लोकांक खूबश्या समस्यांक फुडो करचो पडटा.
उदकास्रोत, पीडब्ल्यूडीची जापसालदारकीः उपमहापौर
पाट्या वयल्या ह्या प्रकारा विशीं उपमहापौर संजीव नायक हांचे कडेन संपर्क केलो. तांणी सांगलें, पाटो वाठारांत उदक सांचून उरचें न्हय, हे खातीर मनपान गटारांची नितळसाण केल्या. ते उपरांत लेगीत उदक सांचून उरता जाल्यार त्या उदकाचो विलो रावपाची जापसालदारकी उदकास्रोत आनी भौशीक बांदकाम खात्याची (पीडब्ल्यूडी) ह्या दोन खात्यांची आसा. तांणी तें काम करूंक जा, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
