भांगरभूंय | प्रतिनिधी
गोंयांत 50 दिसांत विक्रम
भांगरभूंय । प्रतिनिधी
पणजीः हवामान खात्यान दिल्ले म्हायती प्रमाण गोंयांत 1 जून ते 20 जुलय सकाळच्या 8.30 वरां मेरेन गोंयांत सरासरी 99.14 इंच पावसाची नोंद जाल्ली. दीसभर घोग्यांनी पडिल्ल्या पावसान गोंयांत शेनवारा सांजे मेरेन शेंकडो हुपलो. 1 जून ते 20 जुलय ह्या 50 दिसांनी गोंयांत सरासरी 100 इंचा परस अदीक पावसाची नोंद जाल्या.
अंदूं पावसाचें प्रमाण 57.2 टक्क्यांनी चड आसा. मजगतीं, वाळपय सगळ्यांत चड 115 इंच पावस पडला. गोंयांतल्या 13 तल्या 6 केंद्रांनी पावस शंबरा परस चड जाला. सांग्यार 111.18 इंच, सांखळे 108.17 इंच, फोंड्यां 105.20 इंच, काणकोणां 103.49 इंच आनी पेडण्यां 101.48 इंच पावसाची नोंद जाल्या.
शेनवारा गोंयांत सगळेच कडेन पावसान झोड दिलो. कांय कडेन पडझडीच्यो घडणुको घडल्यो. जाल्यार कांय कडेन झाडां पडिल्ल्यान लुकसाणीच्या घडणुकांची नोंद जाली. खूबश्या रस्त्यांचेर उदक सांचून उरलें. न्हंयांची पातळी वाडली. हवामान खात्यान 20 ते 24 जुलय मजगतीं उटंगाराच्या पावसाची शक्यताय उक्तायल्या आनी ऑरेंज अलर्ट जारी केला.
गोंयांत फाटल्या 24 वरांत सरासरी 2.16 इंच पावसाची नोंद जाल्या. ह्या काळांत पेडण्यां सगळ्यांत चड 3.48 इंच पावसाची नोंद जाली. काणकोणां 3.31 आनी वाळपय 2.85 इंच पावसाची नोंद जाली. शेनवारा पणजे चडांत चड 28.1 आनी उण्यांत उणें 25 अंश सेल्सियस ताममानाची नोंद जाली. मुरगांवां चडांत चड तापमान 27.4 अंश जाल्यार उण्यांत उणें 25.2 अंश सेल्सियस आसलें. फुडल्या पांच दिसांत चडांत चड 27 ते 28 आनी उण्यांत उणें 24 ते 25 अंश सेल्सियस आसपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
