भांगरभूंय | प्रतिनिधी
मुख्यमंत्री डॉ. प्रमोद सावंत हांचें सभाघरांत आस्वासन
पणजीः राज्यांतल्या ५६८ शाळांचें सुरक्षा ऑडीट जालां आनी उरिल्लें ३०२ शाळांचें सुरक्षा ऑडीट १०० टक्के फुडल्या एका म्हयन्या भितर जातलें. असुरक्षीत शाळेचीं इमारती पावसा पयलीं दुरुस्त जातली, अशें आस्वासन मुख्यमंत्री डॉ. प्रमोद सावंत हांणी सभाघरांत दिलें.
विरोधी आमदारांनी राष्ट्रीय शिक्षणीक धोरणा खाला राष्ट्रीय क्रेडीट फ्रेर्मवर्क (एनसीएफ) हो विशय सभाघरांत लावन धरलो.
एनईपीची अंमलबजावणी करतना राज्य सरकारान थारयल्ल्या शिकोवपाच्या वरांत कोफुसांव आसा. एके वटेन वर्साक शिकोवपाची १११० वरां म्हण सांगता तशेच दुसरे वटेन १२०० वरां असो उल्लेख केला. ह्या दोन वरां मदीं कसलोच समन्वय दिसून येना, अशें केपेंचे आमदार एल्टन डिकोस्टा हांणी दाखोवन दिलें.
हे विशीं जाप दितना मुख्यमंत्र्यान सांगलें, एनसीएफ मार्गदर्शक तत्वा प्रमाण १११० वरां हो शालेय अभ्यासक्रम शिकोवपा खातीर आसात जाल्यार अतिरीक्त १०० वरां हो अतिरीक्त अभ्यासक्रम जसो कला आनी शारिरीक अभ्यासा खातीर आसात. जाका लागून वट्ट शिक्षणीक वरां १२०० मेरेन वतात.
हे विशीं ३१ मे २०२४त शिक्षण खात्यान परिपत्रक जारी करून अतिरीक्त शिक्षक, कामाचे जापसालदारकी खोलायेन समजावन सांगलां. विद्यार्थ्यांचे आवडी प्रमाण अतिरिक्त अभ्यासक्रम थारयल्यात आनी एनसीएफचे मार्गदर्शक तत्वां पाळूनच हे परिपत्रक जारी केल्ल्याचें मुख्यमंत्री सावंत हांणी सांगलें.
मजगतीं,एनसीएफ मार्गदर्शक तत्वा प्रमाण ९५५ वरां ही शालेय अभ्यासक्रमा खातीर आनी २४५ वरां हीं अतिरीक्त अभ्यासक्रमा खातीर दवरून शिकोवपाची वट्ट वरां ११२० इतलीं आसचीं अशी सुचोवणी आसा, अशें विरोधीपक्ष फुडारी युरी आलेमाव हांणी दाखोवन दिलें.
ते भायर शिक्षण संचालकान उच्च न्यायालयांत परिपत्रक सादर करतना अतिरीक्त अभ्यासक्रमा खातीर १४५ वरां निश्चीत केल्ल्याचें सांगलां. हीं यंत्रणां पयलीं सावन लागू आसात देखून भुरग्यांक सरकार एप्रिल म्हयन्यांत शाळेंत कित्याक आपयता. ते भायर राज्यांतल्या खुबश्या शाळांनी सुरक्षा ऑडीट जावंक ना. सरकार एनईपीच्या मार्गदर्शक तत्वा प्रमाण चलना, असो आरोप आलेमाव हांणी केलो.
सगल्या भागधारकांक विस्वासांत घेवनच एनइपीची अंमलबजावणी केल्ल्याची जाप मुख्यमंत्र्यान आलेमाव हांकां दिली.
एप्रिल म्हयन्यांत शिक्षणीक वर्स सुरू करपाचो निर्णय सगले पालक शिक्षक संघ, शाळा वेवस्थापन हांकां विस्वासांत घेतले उपरांत घेतला. जे समान्य गोंयकारांचे भुरगे आसात ते अनुदानी आनी सरकारी शाळांनी शिकतात आनी गिरेस्त भुरगे अंतरराष्ट्रीय शाळांनी शिकतात. सामान्य गोंयकारांच्या भुरग्यांक आमी पुराय अभ्यासक्रम आमी पयलींच शिकयतात, अशें मुख्यमंत्र्यान सांगलें.
मजगतीं, खुपश्यो शाळा असुरक्षीत आसात आनी ह्या शाळांची दुरूस्ती भौशीक बांदकाम खात्याचे दुरूस्ती विभाग पळयता. मात हो विभाग हेर कामांनी व्यस्त आशिल्ल्यान ह्या इमारतींचे दुरूस्तींक कळाव जाता. देखून ह्या शाळांच्या इमारतीं खातीर नोडल एजन्सी नियुक्त करपाची मागणी सांत आंद्रेचे आमदार विरेश बोरकार हांणी केली.
हे विशीं जाप दितना मुख्यमंत्र्यान सांगलें, इमारत विभाग सगलीं कामां कुशीक दवरून प्राधान्यान शाळांचें दुरुस्ती काम घेतलें. मे सोंपता म्हणसर पावस सुरू जावचे पयलीं सगलीं दुरूस्ती कामां पुराय जातलीं. ह्या म्हयन्या भितर उरिल्ल्या ३०८ शाळांचें सुरक्षा ऑडीट पुराय जातलें, अशें आस्वासन मुख्यमंत्री सावंत हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
