भांगरभूंय | प्रतिनिधी
बार्देस, पेडणें म्हालांत 10 मेक ‘पावर शटडावन’
पणजी : वीज खात्या वतीन पावसा पयलींच्या दुरुस्ती कामां खातीर पुराय राज्यांत आतां ‘पावर शटडाव’नचें सत्र सुरू जातलें. आत्र्या पयऱ्यान पावर शटडावन सुरू जातलो. पावर शटडावनाची कळोवणी दिसाळ्यांनी नोटीस जारी करून दितले. 10 मेक पावर शटडावनाक लागून बार्देस आनी पेडणें म्हालाक सकाळीं वीज पुरवण जावची ना, अशें वीज खात्यान कळीत केलां.
पावसा पयलीं सबस्टेशन, ट्रान्सफॉर्मर तशेंच विजेच्या लायनीची तपासणी करची पडटा. हाका लागून शटडावन घेवप गरजेचें थारता. पुराय राज्यांत सगली कडेन आतां शटडावन जातलो. हो शटडावन काय वरां खातीर जातलो. लायनी कुशीचीं झाडां कापपा सयत हेर दुरुस्तीचीं कामां करतले अशें वीज मंत्री सुदिन ढवळीकार हांणी सांगलें. पावसांत दुरुस्तीची सगलीं कामां करप शक्य जायना. हाका लागून शटडावन करून दुरुस्ती करची पडटा अशें मंत्री ढवळीकार हांणी सांगलें.
शेनवारा 10 मेक थिवी सबस्टेशनांतल्या 220 केव्ही लायनीची दुरुस्ती जातली. हाका लागून बार्देस आनी पेडणें म्हालाक सकाळीं 6 ते दनपारां 2 मेरेन वीज पुरवण जावची ना. म्हापशें जिल्हो हॉस्पिटल, मोपा विमानतळ आनी अस्नोडें उदका पुरवण प्रकल्पाची वीज पुरवण सुरू उरतली. दिवचल म्हालाक आमोणें सबस्टेशनांतल्यान वीज पुरवण जातली.
थिवी सबस्टेशना उपरांत दिवचल, आमोणें, सांखळे, फोंडें, शेल्डें ह्या सगल्या सबस्टेशनांत दुरुस्ती जातली. पावसांत सुरळीत वीज पुरवण जावची म्हूण खात्यान फावो ती वेवस्था केल्या. पावसांत आवश्यक आशिल्ल्या सामानाची खरेदी केल्या. पावसांत सामानाचो उणाव जावचो ना अशी वेवस्था खात्यान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
