भांगरभूंय | प्रतिनिधी
भांगरभूंय । प्रतिनिधी
म्हापशेंः पावसाळ्यांत जळेरां पसून दुयेंसां पातळटात. डेंग्यू, मलेरियाचो प्रादुर्भाव जावचो न्हय हे खातीर उपजिल्होधिकारी यशस्विनी बी हिचे येजमानके खाला बार्देश गट समितीची बसला जाली. म्हापशें नागरी भलायकी केंद्राची वैजकी अधिकारी डॉ शॅरल डिसोझा, मामेलदार प्रवीण गांवस, गोवा कॅनाचो संयोजक रोलंड मार्टिन्स, पर्वरी भलायकी केंद्र सोडून बार्देशांतल्या हेर भलायकी केंद्रांचे प्रतिनिनधी आनी बीडीओ आनी म्हापशें पालिका मंडळाचे प्रतिनिधींनी तातूंत वांटो घेतल्लो.
पोरूं तशेंच आतांय बार्देशांतल्या सगल्या वाठारांनी डेंग्यू आनी मलेरियाचे दुयेंती मेळ्ळ्यात. ताका लागून जळेंरां जावची न्हय हे खातीर उपाय करपाची गरज आसा. भलायकी कार्डां दिल्ल्या बांदकाम कामगारांक मच्छरदाणी उपलब्द करून दिवच्यो हे खातीर भलायकी केंद्रांनी पावलां घालचीं, सगल्या कामगारांची भलायकी कार्डां तयार करपा खातीर प्रशासकीय यंत्रणेन यत्न करचे हे विशीं बसकेंत चर्चा जाली.
बांदकाम चल्लां थंय कामगारांक रावपाक मेळना. मात कंत्राटदार थंय तांका रावपाक दितात. कंत्राटदारांक तशें करपाक मनाय करची. नितळसाण नाशिल्ल्यान त्या वाठारांत जळेरां जावपाची शक्यताय आसा अशें रोलंड मार्टिन्सान सांगलें. कावलांत गेल्ली वाहना उक्ते सुवातांनी दवरिल्ली दिसतात. पावसाच्या दिसांनी तातूंत उदक साठता आनी थंय जळेंरा तयार जातात अशे सांगून बार्देशांतल्यान डेंग्यू, मलेरियाचें निर्मूलन करपा खातीर सगल्या प्रशासकीय एजन्सीन एक जावंन काम करचें अशी सूचोवणी ताणे केली.
बांदकाम प्रकल्पांची पळोवणी करून कामगारांची भलायकी कार्डा तयार करचीं. कंत्राटदार आधारकार्ड पळोवन कामगारांक घेतात. दरेका कामगाराची नोंदणी कामगार आयुक्त खात्यांत करप शक्तीचें आसा. कंत्राटदार तें करतात काय ना हाची पळोवणी संबंदीत खात्यान करून ताचो अहवाल भलायकी खात्याक धाडपाक जाय अशें मार्टिन्स हांणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
