भांगरभूंय | प्रतिनिधी
पावसाचो हंगाम सुरू जाला. पावस सुरू जातकच जायत्या जाणांक गरम गरम भजी, वडा पाव अशीं खाणां खावपाची रुच येता. पूण, जतनाय घेवप गरजेचें. कारण हें वातावरण उदकांतल्यान आनी हवेंतल्यान जावपी दुयेंसांक फावशें आशिल्ल्यान ह्या काळांत आमचें चयापचय मंद जाता, कुडीची जिवीत आनी उर्जेची पातळी उणी जाता. जाका लागून रोगप्रतिकार शक्त दुबळी जाता. देखून आमकां दुयेंस आनी संसर्ग जावपाची चड शक्यताय आसता.
खंयचे पदार्थ खावचे?
तुमच्या आहारांत जीवनसत्व क, अँटिऑक्सिडंट्स आनी विरगळपी तंतू भरपूर आसूंक जाय. तांदूळ, दाळ, चापाती वा भाजी आसूं सगळें ताजें आसूंक जाय. शिजयल्या उपरांत पयल्या वरांत जेवण खावप बरे.
१) पुराय भाजी : रोगप्रतिकार शक्त आनी एकंदरीत भलायकी सुदारपाक फायदेशीर अशी भाजी निवडात. शक्य आसल्यार पुराय भाजी वेंचून काडची आनी भायली कात सोलून काडची. ह्या भाज्यांनी दुधी भोपळो, कारले, गवार, गाजर, मटर, ब्रोकोली आनी दाळ हांचो आस्पाव जाता. हेर भाजयेचे पर्याय काकडी, टोमॅटो, कणगां, भेंडी आनी मुळो हांचो आस्पाव जाता. ह्या भाज्यांनी सैमीक रितीन क्षारीय घटक आसतात जीं रोगप्रतिकार शक्त वाडोवपाक मजत करतात.
२) सूप : उबदार आनी पोशक सूप; जशें- चिकन, भाजी आनी दाळीचो सूप पावसांत उपेगी पडटा. तें पचपाक सोंपें आनी कुडींत उदकाची पातळी सांबाळपाक मजत करूंक शकतात. देखून सांबर आनी रसम खावप जें फकत उश्णताय दिना, पूण तुमची रोगप्रतिकार शक्तय वाडयता.
3) हर्बल टी : आलें, तुळसी आनी पुदीना सारकिल्ल्यो हर्बल टी चे सेवन करून कुडीक उबदार आनी हायड्रेटेड दवरात. हे च्यायेंत वखदी गुणधर्मय आसतात जें पावसांत सामान्य दुयेंसा पसून सुटका दिता.
४) फळां : अँटिऑक्सिडंट्स आनी जीवनसत्वां भरपूर आशिल्लीं हंगामी फळां खावचीं. पूण तीं धुवन कापल्यात, ताजीं आसात हाची खात्री करात. संसर्ग जावचो न्हय म्हणून रस्त्यार विकपी लोकां कडल्यान कापल्लीं फळां आनी रोस पियेवप टाळचें. कापल्लीं फळां फ्रिजांत दवरचीं न्हय. कारण कांय बॅक्टेरिया थंड तापमानांत वाडूंक शकतात.
५) दाळिंब ः दाळिंब थंडी आनी जोर आडावपाक मजत करता. तातूंत अँटीऑक्सिडेंट भरपूर प्रमाणात आसतात. जीवनसत्व, लोखण, मॅग्नेशियम, तंतू, कॅल्शियम आनी हेर पोशक तत्वां चड आशिल्ल्यान पावसाळांतले हे एक उत्तम फळ अशेंय म्हण्टात. पासां, म्होंव आनी खाजूर खावप देखून सुकयल्ल्या फळांतल्यान उर्जा आनी फ्रक्टोज मेळटा.
6) प्रथिनां : दाळ, पाश्चराइज्ड – उकडिल्लें दूद आनी बरी उकडिल्लीं तांतयां ह्या सारक्या स्रोतां वयल्यान जेवणांत फावो तें प्रथिन मेळटा. भलायकी बरी दवरपाक आनी रोगप्रतिकार शक्त घट करपाक हे घटक गरजेचे आसतात.
७) प्रो-बायोटीक्स : धंय आनी ताक आंतकड्यांची भलायकी निरोगी दवरपाखातीर फायद्याची. जीं बरी रोगप्रतिकार शक्त तयार करतात आनी पचनक्रियाक आदार दिवपाक म्हत्वाचीं आसतात.
पावसाळ्यांत खंयचे खाण टाळचे?
1) स्ट्रीट फूड : स्ट्रीट फूड खास करून पानीपुरी, भेलपुरी आनी हेर चाट पदार्थ खावप टाळचें. अस्वच्छ परिस्थिती आनी दुशित उदकाक लागून हे पदार्थ धोक्याचे थारूंक शकतात. खावपाची इत्सा आसल्यार ताजें शिजयल्लें पदार्थ वेंचून काडात. सगळें कच्चें खाण टाळचें.
२) कमी शिजयल्लें मांस, नुस्तें आनी तांतयां: कमी शिजयल्लें मांस, दर्यांतलें खाण (नुस्तें) आनी तांतयां खावप टाळचें. कारण तातूंत हानीकारक बॅक्टेरिया आसूं येतात.
३) सगळ्यांत म्हत्वाचें म्हणल्यार भरपूर उदक पियेवप. प्रवास करतना उदकाची बाटली व्हरची. तशेंच घरगुती लिंबाचें उदक, ताक आनी नाल्लाचें उदक तुमच्या आहारांत आस्पावूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
